އެންމެ ފުރަތަމަ ދީން، މިއީ ޕީއެންސީއިން ވަރަށް ގިނައިން ބުނަމުން އައި ވާހަކައެކެވެ. ނުވަތަ ގެންގުޅު ސްލޯގަންއެކެވެ.

ވަރަށް ރަގަޅު އަދި ހިތަށް އެހާމެ ފިނިކަން ގެނެސްދޭ ސްލޯގަންއެކެވެ. ނަމަވެސް ފޮތެއް އޮތަކަސް އެދުރެއް ނުވޭނެއޭ ބުނާ އުސޫލުން ސްލޯގަންއެއް އޮތަސް އަމަލުނުކުރާ ނަމަ އެއީ ބޭކާރު އެއްޗަކަށް ނުމެ ނޫނީ ނުވެއެވެ.

މި ސަރުކާރަކީ ދީނީ ނުހަނު ގިނަ އިލްމުވެރިންގެ ވެސް ތާއީދާއެކު އައި ސަރުކާރެކެވެ. އެހެންކަމުން އިސްލާމް ދީނު މިއީ މި ސަރުކާރުގެ އެންމެ ފަރސްޓު ޕްރައިރޮޓީއަށް ވެގެން ދާނެ ކަމެއް ކަަމށް ގިނަ ބަޔަކު ގަބޫލުކުރިއެވެ.

ނަމަވެސް ވެރިކަމަށް ހަތް މަސް ދުވަސް ފާއިތުވެގެން ދާއިރު ފެނިގެން ދަނީ އެ އުއްމީދުތަކާ ނުހަނު ބީރައްޓެހި މަންޒަރުތަކެކެވެ. އެގޮތުން އިސްލާމް ދީނަށް ތައުހީނު ކުރުމަކީ އަހަރުމެން ކޮންމެ މުސްލިމަކު ނަފްރަތުކޮސް ކުށްވެރިކުރަން ޖެހޭ ކަމަކަށް ވެއެވެ. އަދި އެފަދަ ބޮޑު ޖަރީމާއެއްގައި ބައިވެރިވާ ބައިވެރީންނަކީ އަހަރުމެންގެ ދުޝްމަނުންކަން ޔަގީނެވެ. ޔައުނީ މުސްލިމުންގެ އަދުއްވުންކަން ޔަގީނެވެ.

ދިވެހިރާއްޖޭގައި އެންމެ ފާޅުކަން ބޮޑުކޮށް އިސްލާމު ދީނަށް ތައުހީނުކޮށް ރަސޫލާ (ޞ.ޢ.ޥ) އަށް ފުރައްސާރަކުރީ މޯލްޑިވްސް ޑިމޮކްރެސީ ނެޓްވޯކު (އެމްޑީއެން) އޭ ކިޔާ ލާދީނީ ޖަމާއަތަކުންނެވެ. އެކަން އޭރު އިދިކޮޅުގައި ތިބެ އަދުވެ ވެރިން ނުހަނު ހަރު އަޑުން ކުށްވެރިކުރިއެވެ. އަދި ތިމަ ތިމާމެމްނގެ ވެރިކަމެއްގައި އެއިން ކޮންމެ މީހަކު އޮންނާނީ ޖަލުގެ ކުޑަ ގޮޅީކަމަށް ބުނަމުން ދިޔައެވެ.

ނަމަވެސް ވެރިކަމާ އާރާ ބާރު ލިބުމުން ފެނުނީ މުޅިން އެހެން މަންޒަރެކެވެ. އެމްޑިއެންގެ ކޯ ފައުންޑަރުންވެސް ތިބި މަގާމުތަކުގައި ބައިތިއްބަން ސިއްރު ޑީލުތައް ހަދާ މަންޒަރެވެ. ނުވީތާތަކަށް އެމްޑިއެންގެ އެއްވެސް މީހަކު ހޯދާ ފިޔަވަޅު އަޅަން ދާޚިލީ ވަޒީރާ ޕޮލިސް ކޮމިޝަނަރވެސް އުޅުއްވާ މަންޒަރެއް ނުފެނެއެވެ. އެންމެ ކުޑަ މިނުން މައްސަލަ ތަހުގީގުކުރަނިކޮށް ފުރައިގެން ދިޔަ ޝަހިންދާއާ އަޒުރާ ގެންނަން ކުޑަ ނަމަވެސް ބާރެއް ނާޅައެވެ.

ދެން އޮތީ އިސްލާމް ދީނަށް ނަސްރު ދިނުމުގެ ވާހަކައެވެ. ފަލަސްތީނު އިޒްރޭލު ހަނގުރާމައަކީ އެކީ ނަސްލެއް ނައްތާލަން ދޭ އުދުވާނީ ހަމަލާތަކެއްކަން މުޅި ދުނިޔެ ގަބޫލުކުރެއެވެ. ދިވެހި ރައްޔިތުން އެންމެ ލާދީނީ ކަމަށް ގަބޫލުކުރި އިބްރާހިމު މުހައްމަދު ސޯލިހުގެ ސަރުކާރުގައި އެ ހަމަލާތައް ސިފަކުރަމުން ދިޔައީ ޖެނޮސައިޑެއްގެ ގޮތުގައެވެ.

ނަމަވެސް ދީނީ އިލުމުވެރިންނާ ފަތުވާ މަޖިލީހުގެ އިސް ޝޭޚުންވެސް ތާއީދާއެކު އައި ޕީއެންސީގެ ވެރިކަމުގައި މިވަނީ ޖެނޮސައިޑު މި ލަފްޒުވެސް ބޭނުންކުރުން ހުއްޓާލާފައެވެ. އެމެރިކާގެ އެންގުމަށެވެ.

މިއީ ނަސްރު ދިނުމުގެ އައު ވައްތަރެއް ތޯއްޗެކެވެ. ދެން އޮތީ އިޒްރޭލު ފަލަސްތީނު ހަނގުރާމައަކީ މުޅި އިސްލާމީ އުއްމަތއް އެކަމުގައި ޝާމިލުވާ ކަމެއްކަން މުޅި ދުނިޔެވސް ގަބޫލުކުރާ އިރު ދިވެހި ސަރުކާރު ތަމްސީލު ކުރާ ޕާޓީގެ ޕީޖީ ޅީޑަރާ ޕީއެންސީގެ މަޖިލިސް މެމްބަރުން ދެކޭ ގޮތުގައި އެއީ "ފޮރިން" ބޮޑު ދެ ގައުމުގެ ދޭތެރޭގައި ހިނގާ ހަނގުރާމައެކެވެ.

ޕިސް ޕިސްއެވެ. އެކަމަކުވާ މިއީ ރަހުމެއްގެ ކަންފުޅެއްވެސް ހިތުގައި ނެތް ބަޔަކީ ބާއެވެ. ކުޑަ ކުދިންނާ އަދި އެކުދިންގެ މައިން މަރާ ހުސްކުރަމުންދާއިރުވެސް ޕީއެންސީއިން މި ބުނަނީ އެއީ ހަނގުރާމައެއް ކަމަށެވެ. މިއީ ފަލަސްތީނު ރައްޔިތުންގެ މޫނުމަތީ ޖެހި ތަފާއްޔެކެވެ. މިއީ ފަލަސްތީނު ރައްޔިތުންނަށް އެހީވަމުން އަންނަ ދިވެހީން ލަދު ގަންނުވާލިކަމެކެވެ.

އިސްލާމީ ނަސްލެއް ނައްތާލަން ޔަހޫދީ ނިރުބަވެރިން ކުރަމުން ގެންދާ މަސައްކަތަކީ ހަނގުރާމައެއްގެ ގޮތުގައި ސިފަކުރިއިރު މި ބޭފުޅުންގެ ބަޔަކަށް މިކަންކަން ތަހައްމަލު ކުރަން ނުޖެހުނިއްޔާ ހާދަހާވާ ރަގަޅެ ހިތަށް އަރައެވެ.

މުސްލިމުން އެންމެ މުގައްދަސް އެއް ބިން ހަފުސްކޮށް ހިފަމުން ދާއިރު މުސްލިމުންގެ ގޮތުގައި ތިބެ ހަމަ އެއީ ހަނގުރާމައެއްގެ ގޮތުގައި ސިފަކުރުމަކީ އެންމެ ޒިންމާދާރުކަން ބޮޑު ގޮތްބާ އޭ ހިތަށް އަރައެވެ.

މުޅި ގައުމު ލަދު ގަންނުވާލާ ޕީއެންސީއިން މި ކުރި ކަމަކީ މުޅި ރާއްޖޭގެ ތާރީޚުގައިވެސް ކަޅު ދުވަހެއްގެ ގޮތުގައި ލިޔެވޭނެ ދުވަހެކެވެ. ކުރާނެ ކަމެއް ނެތެވެ. ނުކިޔަވާ ހުރި މީހަކު ވެރިކަމުގައި ހުރެ ކަނޑުކޮށް ކަންތައް ކުރަމުން ގެންދާތީ ކަމުނުގޮސްގެން ގެނައި ކިޔަވައިގެން ހުރި ބޭފުޅާގެ ސަރުކާރުގައި މި ފެންނަނީ ހުސް ދިވެހިން ލަދު ގަންނަ ކަހަލަ ކަންކަމެވެ. އެކަންވާރަކުން ނުކުންނާނީ އެކަންވާރެއްގައި ހުރި ދިޔައެކެވެ.

ދީން ހިމާޔަތްކުރާނެ ކަމަށް ބުނެ އައި ސަރުކާރަކަށް ހަތް މަސްވެގެން ދިޔައިރު އިޒްރޭލުން ޕާސްޕޯޓު ބޭން ކުރަން ނުކެރޭނީވެސް ގައިމު ކަމެއްވީމަތާއެވެ.

ބުނީ އެންމެ ފުރަތަމަ ދީނޭ، ފެންނަނީ ދީން ހިމާޔަތްކުރުމުގައި ފަހަތު ފަޔަށް ބުރަވާ މަންޒަރެވެ.