20 ވަނަ ރައްޔިތުންގެ މަޖިލީހަށް މެމްބަރުން ހޮވުމަށްޓަކައި ބާއްވާ މަޖިލީސް އިންތިހާބު ރޯދައިގެ ފަހަށް ތާވަލުކޮށްދޭން، ރާއްޖޭގެ އެންމެ މަގްބޫލު ސިޔާސީ ލީޑަރު ރައީސް އަބްދުﷲ ޔާމީންގެ ފަރާތްޕުޅުން އެދިވަޑައިގެންފިއެވެ.

ރައީސް ޔާމީންގެ ފަރާތްޕުޅުން އިލެކްޝަންސް ކޮމިޝަން ގައި މިކަމަށް އެދިފައިވަނީ އެމަނިކުފާނު އަލަށް އުފައްދަވާ ޕާޓިގެ ފަރާތުން އެ ކޮމިޝަނަށް ވަޑައިގެންެވި ވަފްދެއްގެ ފަރާތުންނެވެ.

މަޖިލިސް އިންތިހާބު ބާއްވަން އީސީއިން ނިންމާފައި ވަނީ އަންނަ މާރިޗު މަހުގެ 17 ދުވަހުއެވެ. އެއީ ރޯދަ މަހުގެ ހަތް ވަނަ ދުވަހެވެ. މި ތާރީހުގައި އެ އިންތިހާބު ބާއްވާތީ އެމްޑީޕީން ވެސް މީގެ ކުރިން ކަންބޮޑުވުން ފާޅުކޮށްފައިވެއެވެ.

މިކަމުގެ ކަންބޮޑުވުމާ އެކު ރައީސް ޔާމީންގެ ފަރާތްޕުޅުން އީސީއަށް ވަޑައިގެންނެވި ވަފްދު ކޮމިޝަންގެ މެންބަރުންނާ ބައްދަލު ކުރެއްވުމަށް ފަހު ނޫސްވެރީންނަށް މައުލޫމާތު ދެއްވަމުން ރައީސް ޔާމީންގެ އައު ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދެވުމުގައި އިސްކޮށް އުޅުއްވާ މުހައްމަދު މަލީހް ޖަމާލް ވިދާޅުވީ ރޯދަ މަހު އިންތިހާބު ބާއްވާތީ އެކަމުގެެ ކަންބޮޑުވުން އިލެކްޝަންސް ކޮމިޝަންގެ މެންބަރުންނާއި ހިއްސާ ކޮށްފައިވާ ކަމަށެވެ. އިންތިހާބުތައް ބޭއްވުމަށް ގިނަ ގޮންްޖެހުންތަކެއް ކުރިމަތިވާއިރު ރޯދަ މަހު އިންތިހާބެއް ބާއްވާނަމަ ގޮންޖެހުން ބޮޑުވާނެތީ މަޖިލީސް އިންތިހާބު ރޯދައިގެ ފަހަށް ބަދަލުކުރަން އެދިފައިވާނެ ކަމަށް މަލީހް ވިދާޅުވިއެވެ.

މީގެ އިތުރުން ރައީސް ޔާމީންގެ ފަރާތްޕުޅުން ވަނީ އެމަނިކުފާނުގެ ޝަރީއަތް ނިމެންދެން ޕީއެންއެފް ރަޖިސްޓްރީ ކުރުމަށް މެންބަޝިޕް ފޯމުތައް ހުށަހެޅުން ފަސްކޮށްފައި ނަމަވެސް އެ ޕާޓީގެ ނަމުގައި މަޖިލިސް އިންތިހާބުގައި ވާދަކުރެވޭނެ ފުރުސަތު ތަނަވަސްކޮށް ދިނުމަށް އެދިފައެވެ.

ރޯދަ މަހުގެ ކުރީކޮޅު އިންތިހާބު ބޭއްވުމަށް އީސީން ނިންމާފައިވާ ސަބަބަތަކުގެ ގޮތުގައި ބުނެފައި ވަނީ، ރޯދަ މަހުގެ ފަހުގެ ތާރީހެއްގައި ބާއްވާ ނަމަ އެ ކަމަށް އިދާރީ ބޮޑެތި ހުރަސްތަކެއް ހުރުމާ ރޯދަ ނިމި އީދު ބަންދަށް ފަހު ފެށޭ ހަފްތާއަކީ އިސްލާހުކޮށްފައިވާ ތައުލީމީ ކަލަންޑަރުގައިވާ ގޮތުން ސްކޫލްތަކުގެ އިމްތިހާން ދުވަސްވަރު ކަމުން، އެ ދުވަސްވަރު އިންތިހާބު ބޭއްވުމަށް ސްކޫލްތަކުގައި އިންތިހާބީ މަރުކަޒުތައް ގާއިމް ކުރުމަށް އެކަށީގެންވާ ތަންތަން ނުލިބޭނެތީ އާ އަދި ރޯދަ މަހުގެ ފަހު ދިހައިގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި މިހާރު ކަނޑައަޅާފައި ވާތީ ސަރުކާރުގެ ވުޒާރާތަކާއި ދައުލަތުގެ މުއައްސަސާތަކުގެ އެހީތެރިކަމާއި އެއްބާރުލުން ލިބުމުގައި ދަތިތަކެއް ކުރިމަތިވާނެތީއެވެ.