ރައީސް ޑރ މުހައްމަދު މުއިއްޒު އިންޑިޔާގެ ބޮޑު ވަޒީރު ނަރެންދްރަ މޯދީއަށް މަރުޚަބާ ދެންނެވުމާއެކު، މޯދީ ތިން ވަނަ ދައުރަކަށް ހުވާ ކުރާ ރަސްމިއްޔާތައް ދައުވަތު ދީފިއެވެ.

މިކަން އިންޑިޔާގެ ނޫސްތަކުން ވަނީ ކަށަވަރުކޮށްދީފައެވެ.

އެގޮތުން މޯދީ ތިން ވަނަ ދައުރަކަށް ހުވާ ކުރެއްވުމަށް އަންނަ ހޮނިހިރު ދުވަހު އަންނަނީ ތައްޔާރުވަމުންނެވެ.

މޯދީ ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް ރާއްޖޭގެ އިތުރުން ސްރީލަންކާ، ބަންގްލަދޭޝް، ނޭޕާލް، ބޫޓާން، އަދި މޮރިޝަސްގެ ވެރިންނަށް އިންޑިއާ އިން ވަނީ ދައުވަތު ދީފައެވެ.

އަދި ބައެއް ގައުމުތަކުގެ ވެރިން އެ ދައުވަތު ގަބޫލު ވަނީ ކުރައްވާފައެވެ.

އޭގެ ތެރޭގައި ހިމެނެނީ ބަންގްލަދޭޝްގެ ބޮޑުވަޒީރު ޝެއިހް ހަސީނާ އާއި ސްރީލަންކާގެ ރައީސް ރަނިލް ވިކްރަމަސިންހައެވެ.

ރައީސް މުއިއްޒަށް ދެއްވި ދައުވަތު ގަބޫލުކުރައްވާފައިވާ ކަމެއް ނުވާކަމެއް އަދި އެނގިފައިނުވެއެވެ.

މިކަމާ ގުޅިގެން ތޭރަ އޮންލައިން ވަނީ ރައީސް އޮފީހުގެ ބަހެއް ލިބޭތޯ މަސައްކަތް ކޮށްފައެވެ. ނަމަވެސް އަދި އެދެވޭ އެއްވެސް ޖަވާބެއް ލިބިފައިނުވާކަން ވެސް ފާހަގަކޮށްލެވެއެވެ.

ރައީސް މުއިއްޒު ވަނީ ބުދަ ދުވަހު އެކްސްގައި ޕޯސްޓެއް ކުރައްވާ އިންޑިއާގެ އާންމު އިންތިޚާބު ކާމިޔާބު ވެއްޖެ ކަމަށް ބޮޑު ވަޒީރު މޯދީ އިއުލާން ކުރެއްވުމުން އެމަނިކުފާނަށް މަރުޚަބާ ދަންނަވާފައެވެ.

އެގޮތުން އެ ޕޯސްޓުގައި އިތުރަށް ރައީސް މުއިއްޒު ވިދާޅުވެފައިވަނީ ތަރައްޤީއާ ހަމަޖެހުން ހޯދުމަށް ދެ ޤައުމު ގުޅިގެން ކުރެވޭ މަސައްކަތް އިތުރުވެގެންދާނެ ކަމަށް އުންމީދުކުރައްވާ ކަމަށެވެ.

ރައީސް މުއިއްޒު މިފަދައިން ވިދާޅުވެފައިވާއިރު، ވެރިކަމަށް އައުމުގެ ކުރިންވެސް އެމަނިކުފާނު ދައްކަވާފައިވަނީ އިންޑިޔާއަށް ބަރޯސާނުވެ އުޅެވޭނެ ގޮތްތަކެއް އެމަނިކުފާނަށް ވެރިކަން ލިބިއްޖާ ހޯދާނެކަމަށެވެ.

ނަމަވެސް މިހާރު ވަނީ އެމަނިކުފާނުގެ ރާގު ބަދަލުވެފައެވެ. ނަތީޖާއެއްގެ ގޮތުން ފެނިގެންދަނީ ރައީސް މުއިއްޒު މޯދީ އަށް ސަނާ ކިޔަމުން ގެންދަވާ މަންޒަރެވެ.

އެގޮތުން އެމަނިކުފާނަށް މޯދީ ހުވާކުރެއްވުމުގެ ރަސްމިއްޔާތައް ދައުވަތު ދެއްވާފައިވެސް އެވަނީ ސަނާކިޔަމުން ދާތީކަމަށާއި އިންޑިޔާ އާއެކު ގުޅުން ބާއްވަން ބޭނުންވާ ކަމަށް ވިދާޅުވުމުންހެން ބޮޑަށް ބެލެވެއެވެ.