2023 ވަނަ އަހަރުގެ ފުރަތަމަ ފަސް މަސް ދުވަހުގެ ތެރޭގައި ތަރައްގީގެ މަޝްރޫއުތައް ކުރިއަށްގެންދިޔުމަށް ކުރީ ސަރުކާރުން ހޭދަކުރި އަދަދަށް ވުރެ މި އަހަރުގެ އެ މުއްދަތުގައި، މި ސަރުކާރުން ހޭދަކުރި އަދަދު ދަށްކަމަށް މާލީ ހިސާބުތަކުން ދައްކައިފިއެވެ.

މިކަން ހާމަވެފައިވަނީ ފިނޭންސް މިނިސްޓްރީން ނިމިދިޔަ މަހުގެ 30 ވަނަ ދުވަހާ ހަމަޔަށް އާންމުކޮށްފައިވާ ދައުލަތުގެ އާމްދަނީ އާއި ހަރަދުތައް ހިމެނޭ ވީކްލީ ފިސްކަލް ޑެވެލޮޕްމެންޓް ރިޕޯޓުންނެވެ.

ތަރައްގީގެ މަޝްރޫއުތަކަށް ކުރާ ޚަރަދު ދަށް ކުރުމަށްފަހު މި ސަރުކާރުން ގެންދަނީ ސިޔާސީ މަގާމްތަކަށް އައްޔަންކޮށްފައިވާ ފަރާތްތަކަށް މުސާރަ ދިނުމަށް ބޮޑެތި ޚަރަދުތައް ކުރަމުންނެވެ.މިކަން އެ ރިޕޯޓުން ސާފެވެ.

އެގޮތުން ކެޕިޓަލް ހަރަދުތަކުން 2.4 ބިލިއަން ރުފިޔާ ސަރުކާރުން އުނިކޮށްފައިވާއިރު އެ ފަރާތްތަކަށް މުސާރަ ދިނުމަށް ކުރި ހޭދަ ވަނީ 614 މިލިއަނުން އިތުރުވެފައިކަން ފާހަގަކޮށްލެވެއެވެ.

މިދިޔަ އަހަރުގެ ފުރަތަމަ ފަސް މަހު ދައުލަތުން މުސާރަ ދޭން ހޭދަކޮށްފައިވަނީ 4.8 ބިލިއަން ރުފިޔާ (4,858 މިލިއަން ރުފިޔާ) އެވެ.

ނަމަވެސް މި އަހަރުގެ އެ މުއްދަތުގައި ދައުލަތުގެ މުސާރަ ބިލު 5.4 ބިލިއަން ރުފިޔާ (5,472 މިލިއަން ރުފިޔާ) އަށް ވަނީ އަރާފައެވެ.

ކުރީ ސަރުކާރަށް ފާޑުކިޔުންތައް އަމާޒުކުރުމަށްފަހު ވެރިކަމަށް އައި ސަރުކާރުގެ ފުރަތަމަ ފަސް މަސްދުވަހު ދައުލަތގެ ފައިސާ ހޭދަކޮށްފައި މިވަނީ މުސާރަ ދިނުމަށެވެ.

މިކަމުގެ ސަބަބުން މި އަހަރުގެ މެއި މަހުގެ ނިޔަލަށް ތަރައްގީގެ މަޝްރޫއުތަކަށް ސަރުކާރުން ހޭދަކޮށްފައިވަނީ އެންމެ 2.7 ބިލިއަން ރުފިޔާއެވެ. އަދި މުސާރަ ދިނުމަށް ބޭނުންކޮށްފައިވާ ފައިސާގެ އަދަދު ވަނީ 600 މިލިއަނަށް ވުރެ އިތުރުވެފައެވެ.

މަތި ލުއި ސަރުކާރެއް ގާއިމްކުރުމުގެ ވައުދާއެކު ވެރިކަމަށް އައި ސަރުކާރުގައި ސިޔާސީ މަގާމްތައް ވަނީ އިންތިހާއަށް ގިނަވެފައިކަން ފާހަގަކޮށްލެވެއެވެ.