ރައީސް ޑރ މުހައްމަދު މުއިއްޒާ މަޖިލިސް ރައީސް އަބްދުއްރަހީމް އަބްދުﷲ (އަދުރޭ) ގެ ހީލަތްތެރި ރޭވުން ބޭޒާރުވެއްޖެކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން އެ ޕޯސްޓްގައި ޑރ ޖަމީލް އިތުރަށް ވިދާޅުވެފައިވަނީ ބާރުތައް ލިބުނީމާ ތިމާ މީހާގެ ނަސީބު ބަދަލުކޮށްލުމަކީ ވަރަށް ވެސް ފަސޭހަކަމެއް ކަމަށެވެ.

އެމަނިކުފާނު އެފަދައިން އިޝާރަތްކުރައްވާފައި އެވަނީ ރައްޔިތުންގެ މަޖިލީހުގެ ބިއުރޯ ޗީފްގެ މަގާމަށް އައްޔަންކުރި، އެ މަޖިލީހުގެ ކުރީގެ މެމްބަރު އަހުމަދު ނިހާން ހުސައިން މަނިކުގެ މައްޗަށް ޕްރޮސެކިއުޓަރ ޖެނެރަލް އޮފީހުން އުފުލި ހިޔާނާތުގެ ދައުވާތައް އަނބުރާ ގެންދިޔުމާ ގުޅިގެންނެވެ.

އެގޮތުން ޑރ ޖަމީލް ވިދާޅުވީ ނިހާން ވަރަށް މޮޅު ކަމަށެވެ. އެއްވެސް ކަމެއް ނުކޮށް ސަނާ ކިޔުމުން ނިހާން ވީ ހުދުކާފޫރަކަށް ކަމަށެވެ.

ނަމަވެސް ރައީސް އަބްދުﷲ ޔާމީން އަބްދުލްގައްޔޫމްގެ ފޮޓޯ ދައްކައިގެން، އެމަނިކުފާނުގެ ތަރައްގީ ވިއްކައިގެން ހޯދި ވެރިކަމެއްގައި އެމަނިކުފާނުގެ މައްޗައް ކުރީ ސަރުކާރުން ކޮށްފައިވާ ދައުވާތައް އަނބުރާ ގެންދިޔުމަށް އަދުގެ ސަރުކާރުން ފަސްޖެހޭތީ ޑރ ޖަމީލް ވަނީ ފާޑުވިދާޅުވެފައެވެ.

އިތުރަށް ޑރ ޖަމީލް ވިދާޅުވީ ރައީސް މުއިއްޒު އަދި އަދުރޭއަށްވެސް ނިހާންގެ ކަރާމާތް ރައީސް ޔާމީނަށްވުރެ ބޮޑުކަމަށެވެ.

ނިހާންގެ މައްޗަށް ރިޝްވަތު ހިފުމުގެ ތިން ދައުވާއަކާއި ރިޝްވަތަށް އެދުމުގެ ދެ ދައުވާއަކާއި، މަނީ ލޯންޑަރިންގެ ދައުވާއެއް އުފުލިފައިވާއިރު މި ދައުވާތައް ޕީޖީން އަނބުރާ ގެންގޮސްފައިވަނީ 2 މަސް ކުރިން މި ސަރުކާރު އައިފަހުންނެވެ.