ދިވެހީންގެ ރާއްޖޭގައި ދިވެހިންނަށް އިސްކަންދޭނެ ކަމަށް ބުނެ އިންޑިއާ އައުޓް ކެމްޕޭނުގެ ދަށުން ރިޔާސީ އިންތިޚާބު ލީޑްކުރައްވައި ހުވާކުރެއްވުމަށްފަހު ރައީސް މުއިއްޒުގެ ރާގު މިހާރު ބަދަލުވެއްޖެއެވެ. އިންޑިޔާގެ ސިފައިން ރާއްޖޭގައި ހަރަކާތްތެރިވެވިގެން ނުވާނެ ކަމަށާއި ކުރީގެ ސަރުކާރުން ހާމަކުރަމުން ދިޔައީ ދޮގު މައުލުމާތުތަކެއް ކަމަށް ބުނެ އޭރު އަޑުގަދަކުރަމުން ގޮސްފައިވެއެވެ. ނަމަވެސް ވެރިކަމުގެ ބާރު އަތަށް އެރުމާއިއެކު ހާމަކޮށްފައިވަނީ ހަމަ ކުރީ ސަރުކާރުންވެސް ހާމަކޮށްފައިވާ އަދަދުތަކާއި މައުލޫމާތުތަކެވެ.

ކުރީގެ ނައިބު ރައީސް ޑރ ޖަމީލް އެކްސްގައި ކުރައްވާފައިވާ ޕޯސްޓްއެއްގައި ''މޯލްޑިވްސް ފަސްޓް" ސިޔާސަތަކީ ކޮބާކަން ހާމަކޮށްދެއްވުމަށް މުއިއްޒު އަށް ގޮވާލާފައިވެއެވެ. ދެކޮޅުޖެހޭ ޚާރިޖީ ސިޔާސަތެއް މުއިއްޒު އަތުގައި ނެތް ކަމަށާއި ފެންނަމުންދަނީ އިންޑިޔާއަށް މީގެ ކުރިން ރާއްޖެ އަޅުވެތިނުވާ ވަރަށް އަޅުވެތިވެފައިވާ މަންޒަރު ކަމަށެވެ.

އިންޑިޔާގެ ބޮޑު ވަޒީރު ހުވާކުރެއްވުމުގެ ރަސްމިއްޔާތަށް ވަޑައިގެން ޕީއެސްއެމްއިން އެ ޖަލްސާ ލައިވް ކުރުމަށް ނިންމާފައިވަނިކޮށް އާންމުންގެ ފާޑުކިޔުންތަކާއި ހުރެ ވަނީ ލައިވް ނުކުރަން ނިންމާފައެވެ.

މީގެ އިތުރުން، މުއިއްޒު މިހާރު އެ ހުންނެވީ އުނބައްޖެހިފައި ކަމަށާއި އިންޑިޔާއިން ރަނގަޅަށްވެސް ރާއްޖޭގެ ކޮންޓްރޯލް ނަގާފައިވާ ކަމަށް ޖަމީލް ފާހަގަކޮށްފައިވެއެވެ.