އިންޑިޔާ ސިފައިން ބޭލުމަކީ އެހާ ފަސޭހަކަމެއް ނޫންކަމަށް ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުالله ނާޒިމް ވިދާޅުވުމުން ރައީސް އަބްދުﷲ ޔާމީން އަބްދުލްގައްޔޫމް ފާޑު އަމާޒުކުރައްވައިފިއެވެ.

ރައީސް ޔާމީން އަލަށް އުފައްދަވާ ސިޔާސީ ޕާޓީގެ ފަރާތުން 20 ވަނަ ރައްޔިތުން މަޖިލީހުގެ އިންތިޚާބުގައި ވާދަކުރައްވާ ފަރާތްތަކަށް ޚާއްސަކޮށްގެން ބޭއްވުނު ފްރޮންޓް އޮފީސް ޖަލްސާގައި އޯޑިއެންސްގެ ފަރާތުން ސުވާލު ކުރައްވަމުން ރައީސް ޔާމީން ވަނީ އެމަނިކުފާނުގެ ހުރި ކަންބޮޑުވުންތައް ފާހަގަކޮށްފައެވެ.

އޭގެއިތުރުންވެސް އެމަނިކުފާނު ވިދާޅުވީ އެއްވެސް މަސައްކަތަކީ ފަސޭހަ މަސައްކަތަކަށް ނުވެދާނެކަމަށެވެ.ރައީސް ޔާމީން ވަނީ ސަރުކާރުން މާޗް 15 ގެ ކުރިން އިންޑިޔާ ސިފައިން ބޭލުމަށް އެ ގައުމަށް އެންގެވި އެންގެވުމާއި ގުޅިގެން ރައްދެއްވެސް ދެއްވާފައެވެ.

އެގޮތުން އެމަނިކުފާނު ވަނީ އެ ގައުމުގެ ބައެއް ނޫސް ތަކުގައި މި މައްސަލައާއި ގުޅިގެން ޝާއިއު ކޮށްފައިވާ ހަބަރުތަކުގެ ވާހަކަ ފާހަގަކުރައްވާފައެވެ. އެ ނޫސް ތަކުގައި ވާގޮތުން ދިވެހިރާއްޖޭގެ ޚާރިޖީ ވުޒާރާގެ ފަރާތަކާ އިންޑިޔާގެ ވަފްދެއް ބައްދަލު ކުރައްވާފައިވީ ނަމަވެސް އެ ބައްދަލުވުމުގައި އެއްގޮތަކަށްވެސް އިންޑިޔާ ސިފައިން ފައިބަންވީ ދުވަހެއްގެ ވާހަކަ މަޝްވަރާކުރެވިފައިނުވާކަމަށް ރައީސް ޔާމީން ވަނީ ވިދާޅުވެފައެވެ.

"އިންޑިޔާ އައުޓް" ގެ ނަމުގައި އިންޑިޔާ ސިފައިން މި ގައުމުން ބޭލުމުގެ މަސައްކަތަކީ ފާހަގަކޮށްލެވޭ ގޮތުގައި ރައީސް ޔާމީން އިސްވެ ހުންނަވާ ރާއްޖޭގެ އެކި ކަންކޮޅު ތަކުގައި ފެއްޓެވި ހަރަކާތެކެވެ. އެމަނިކުފާނު އަދިވެސް ގޮވަމުންދަނީ ރާއްޖޭގައި ގާއިމްވެފައި ތިބި އިންޑިޔާގެ ސިފައިން ބޭލުމަށެވެ.