ރައީސް ޑރ މުހައްމަދު މުއިއްޒުގެ އަރިހަށް، ޗައިނީޒް ޕީޕަލްސް ޕޮލިޓިކަލް ކޮންސަލްޓޭޓިވް ކޮންފަރެންސްގެ 14 ވަނަ ނެޝަނަލް ކޮމިޓީގެ ވައިސް ޗެއާމަން، ބަޓީރް، އިހްތިރާމުގެ ޒިޔާރަތެއް ކުރައްވައިފި އެވެ.

ރައީސް އޮފީހުން ބުނީ މި ބައްދަލުކުރެއްވުމުގައި ރައީސް ވަނީ ޗައިނާ އާއި ރާއްޖޭގެ ގާތްގުޅުން ފާހަގަކުރައްވައި ޗައިނާގެ އެހީތެރިކަމާއެކު ކުރިއަށްގެންދިޔަ މުހިންމު މަޝްރޫއުތަކުގެ މައްޗަށް އަލިއަޅުއްވާލައްވައި ޗައިނާ-މޯލްޑިވްސް ފްރެންޑްޝިޕް ބްރިޖްގެ ކާމިޔާބީއަށް އިޝާރާތްކުރެއްވި އެވެ.

ރައީސް ޔާމީންގެ ވެރިކަމުގައި ޗައިނާގެ އެހީ ދަށުން ރާއްޖެއަށް ބޮޑެތި ކުރިއެރުން ގެނެސްދެއްވާފައިވާއިރު އޭގެ ފަހުން ރާއްޖެއާއި ޗައިނާގެ ގުޅުން ވަނީ އޭރަށްވުރެ ހީނަރުވެގެން ގޮސްފައެވެ. ޑރ މުއިއްޒު ވެރިކަމަށް ވަޑައިގެން ޗައިނާ އާއި އޮތް ގުޅުން ރަނގަޅު ކުރައްވާނެ ކަމަށް ހީވެފައި އޮތްއިރު، ކަންތައް ވެގެން ދިޔައީ އިދިކޮޅަށެވެ. ރިޔާސީ އިންތިޚާބު ދުވަސްވަރު އިންޑިޔާއާއި ދެކޮޅަށް ބޮޑެތި ކެމްޕޭންތައް ކޮށް ޗައިނާގެ އިތުބާރު ހޯއްދަވާ އިންތިޚާބު ކާމިޔާބު ކުރެއްވުމަށްފަހު ދައްކަވާފައިވަނީ މުޅިން އެހެން މަންޒަރެކެވެ. އިންޑިޔާ ފައިބުޑަށް ވެއްޓި އިންޑިޔާއާއި ނުލާ ދިވެހިންނަށް ނޫޅެވޭ ހިސާބަށް ގުޅުން ބަދަހިކުރަމުންދާތަން ދަނީ ފެންނަމުންނެވެ.

މީގެ އިތުރުން، 2014 ވަނަ އަހަރު ޗައިނާގެ ރައީސް ރާއްޖެއަށް ކުރެއްވި ފުރަމާނަ ދަތުރުފުޅާއި، ދާދިފަހުން ރައީސް ޗައިނާއަށް ކުރެއްވި ފުރަމާނަ ދަތުރުފުޅުގެ ސަބަބުން ދެގައުމުގެ ގުޅުން ގާތްވެ، ރަޙްމަތްތެރިކަން އިތުރަށް ބަދަހިވެއްޖެކަން ވައިސް ޗެއާމަން، ބަޓީރް ފާހަގަކުރެއްވާފައިވެއެވެ.