އިސްރާއީލުން ފަލަސްތީނުގެ މަސައްކަތްތެރިންގެ ބަދަލުގައި އިންޑިއާއާއި، ސްރީލަންކާއިން މަސައްކަތްތެރިން ގެންނަކަމަށް އެ ސަރަހައްދުގައި ހަރަކާތްތެރިވަމުން އަންނަ ނޫސްވެރިން ހާމަކޮށްފިއެވެ.

ޣައްޒާގައި ހަނގުރާމަ ފެށިފަހުން އިސްރާއީލުން ވަނީ ފަލަސްތީނުގެ 10،000 މަސައްކަތްތެރިން އިސްރާއީލުން އެތެރެވުން މަނާކޮށްފައެވެ.

ނަމަވެސް ފަލަސްތީނުގެ މަސައްކަތްތެރިންނަށް ބާރުއެޅުމުގެ ސަބަބުން މަސައްކަތްތެރިންގެ ދަތިކަން ކުރިމަތިވެ، އިސްރާއީލު ސަރުކާރުން ވަނީ އިންޑިއާ އާއި ސްރީ ލަންކާ ފަދަ ގައުމުތަކުން ރިކްރޫޓްމަންޓް ޑްރައިވެއް ފަށާފައިއެވެ.

އަލްޖަޒީރާގެ މިނެލް ފަރްނާންޑޭޒް ސްރީލަންކާގެ ގަލަހާއިން ރިޕޯޓްކޮށްފައިވަނީ މި ފުރުސަތުގައި ސްރީ ލަންކާއިން ދަނީ އިސްރާއީލުގައި ބޮޑު އުޖޫރައެއް ހޯދުމާއި ދިރިއުޅުމުގެ ފެންވަރު ރަނގަޅުކުރުމަށް މި ފުރުސަތުގެ ބޭނުން ހިފަމުން ކަމަށެވެ.

އިސްރާއީލުން ފަލަސްތީނަށް ދެމުން އަންނަ ހަމަލާތަކަށް އެއްވެސް މަޑުޖެހުމެއް އައިސްފައި ނުވާއިރު، ބޭސްފަރުވާ އާއި ސާފުބޯފެން ނުލިބުމުގެ ސަބަބުން އެގައުމުގެ ރައްޔިތުންގެ ތެރޭގައި އެކި ކަހަލަ ބަލިމަޑުކަން ދަނީ ފެތުރެމުންނެވެ.

މީގެ އިތުރުން ކާބޯތަކެތި ނުލިބުމުގެ ސަބަބުން ފަލަސްތީނުގެ ރައްޔިތުން ވަނީ ބަނޑައްޖެހިފައި ކަމަށްވެސް އެ ގައުމުގެ ހެލްތު މިނިސްޓްރީއިން ވަނީ ބުނެފައިއެވެ.

އޮކްޓޯބަރު މަހުގެ 7 ވަނަ ދުވަހުން އިސްރާއިލުން ފަލަސްތީނަށް ދެމުން އަންނަ ހަމަލާތަކުގައި ޝަހީދުވި މީހުންގެ އަދަދު 24،000 ވަނީ ވުރެން މައްޗަށްގޮސްފައިއެވެ.