މަޖިލިސް ރައީސް އަބްދުއްރަހީމު އަބްދުﷲ (އަދުރޭ)އާ ރައީސުލްޖުމްހޫރިއްޔާ މުހައްމަދު މުއިއްޒު ގައުމަށް ޣައްދާރުވެއްޖެ ކަމަށް ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލު ވިދާޅުވެއްޖެެއެވެ.

މަލީހު މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

މާލޭގެ ބައިނަލްއަގްވާލީ ކޮމާޝަލް ޕޯޓު ދިގު މުއްދަތަކަށް ބޭރުގެ ކުންފުންޏަކަށް ދޭން ސަރުކާރުން މަސައްކަތްކުރަމުން ގެންދާތީ އެކަމުގެ ކަންބޮޑުވުމާ އެކު މަލީހު ވިދާޅުވީ، އަދުރޭއާ ރައީސް މުއިއްޒުވެސް މަޤާމުން ދުރުކުރުން ލަސްވެއްޖެ ކަމަށެވެ.

މާލޭ ޕޯރޓު ވިއްކާލުމަކީ ދިވެހި ދިދައާ ދިވެހި ޤައުމު ވިއްކާލުން ފަދަ ކަމެއްގެ ގޮތުގައި ސިފަކުރައްވާ މަލީހު އިތުރަށް ވިދާޅުވެފައިވަނީ ޕޯރޓު ވިއްކާލުމަކީ ނުވަތަ ދިގު މުއްދަތަކަށް ކުއްޔަށް ބޭރުގެ ބަޔަކަށ ދިނުމަކީ އަޅުވެތިވުމަށް ހުޅުވުނު ދޮރެއް ކަމަށެވެ. އަދި އެއީ ޤައުމީ ސަލާމަތަށް އޮތް ނުރައްކަލެއްކަމަށް ވެސް މަލިހު ވިދާޅުވިއެވެ.

ޕޯރޓު ދޫކޮށްލުމުން ތަކެތީގެ އަގު ކަނޑައެޅުން އެހެން ބަޔަކަށް ދޫކޮށްލެވުނީ ކަމަށްވެސް މަލީހުވަނީ ވިދާޅުވެފައެވެ.

މާލޭ ކޮމާޝަލް ޕޯރޓު ބޭރުގެ ކުންފުންޏަކަށް ދޫކުރަން އުޅޭއިރު އެ ކުންފުންނާ އެކު ހަދާ ފަހު ނާމާގައިވެސް ކަންބޮޑުވާ އެތައް ކަމެއް ހުރިކަން ފާހަގަކޮށްލެވެއެވެ. އެގޮތުން ފަހުމު ނާމާ ބާތިލުކުރާ ނަމަ ކުންފުންޏަށް 50 މިލިއަން ޑޮލަރުގެ ބަދަލެއް ދޭން ޖެހެއެވެ. އަދި އެ ކުުންފުނިން ދިވެހި ދައުލަތަށް ޓެކްސް ވެސް ދައްކަން ނުޖެހެއެވެ.