ރައީސް ޑރ މުހައްމަދު މުއިއްޒު ރައްޔިތުންނަށް ވެފައިވާ ކޮންމެ ވައުދެއް "ތުރުކީ ހަނޑުލަށް" ވެގެން ދިއުމުން ކަމަކު ނުދާނެ ކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު ވިދާޅުވެއްޖެއެވެ.

މެމްބަރު ޒިޔާދު މިފަދައިން ވިދާޅުވެފައިވަނީ މަސްވެރިންނަށް ދޭން ޖެހޭ ފައިސާ ނުދޭ މައްސަލާގައި މަރަދޫ ދާއިރާގެ މެމްބަރު އަހުމަދު ދީދީ ހުށަހެޅި ކުއްލި މައްސަލަށް ބަހުސް ކުރައްވަމުންނެވެ.

އެގޮތުން ޒިޔާދު ވިދާޅުވީ މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެއް ކަމަށެވެ.

މަސްވެރިން މުޒާހަރާ ކުރަނީ ވީ ވައުދާ އެއްގޮތަށް ސަރުކާރުން އަމަލު ނުކުރާތީ ކަމަށް ވެސް ޒިޔާދު ވިދާޅުވިއެވެ.

މިއަދު ރާއްޖޭގައި އެންމެ ގިނައިން މުޒާހަރާ ކުރަމުން ދަނީ މަސްވެރިންނަށް ލިބެންޖެހޭ ފައިސާ ނުދޭ މައްސަލާގައިކަމަށް ވެސް ޒިޔާދު ވިދާޅުވިއެވެ.

އަދި މިހާރު ހުރި އަގަށް މަސް ނުގަނެވޭ ނަމަ އެ އަގު ބަދަލު ކުރުމުގެ ފުރުސަތު ވެސް ސަރުކާރަށް އެބައޮތް ކަމަށެވެ.

ވަކި މުއްދަތެއްގައި ފައިސާ ދޭނެ ކަމަށް ވައުދު ވެފައި އޮތުމުން އެ ވައުދާ އެއްގޮތަށް އަމަލު ކުރަން ޖެހޭނެ ކަމަށާއި އެކަން އެމަގުން ކުރިޔަށް ނުދާ ނަމަ ރައްޔިތުން އިހުތިޖާޖު ކުރާނެ ކަމަށް ވެސް ޒިޔާދު ވިދާޅުވިއެވެ.