ހަރަދުތައް ކުޑަކުރުމުގައި އެއްވެސް ރަސްމީ މަސައްކަތެއް ނުކުރައްވާ މީސްމީޑިޔާގައި ރައީސް މުއިއްޒަށް ސަނާ ކިޔުމުގައި ސަރުކާރުގެ އިސް ބޭފުޅުން އުޅުއްވާތީ 19 ވަނަ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ފާޑުވިދާޅުވެއްޖެއެވެ.

ވައްޑެ މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އިގްތިޞާދީ ހާލަތު އޮތީ އަނދަވަޅެއްގައި ކަމަށް ވިދާޅުވެ ރައީސް މުއިއްޒު ވަނީ އެކަން ހައްލުކުރުމަށް ބައެއް ފިޔަވަޅުތަކެއް އަޅަން ނިންމަވާފައިވާކަން އެކްސްގައި އިއުލާން ކުރައްވާފައެވެ.

ވެރިކަމަށް 7 މަސް ވެގެންދިޔަ އިރުވެސް ހަރަދުތައް ކުޑަ ކުރުމަށް އެެއްވެސް މަސައްކަތެއް ނުކުރުމަށްފަހު މީހުންގެ ފާޑުކިޔުން އަމާޒުވަމުން ގެންދާތީ އެމަނިކުފާނު ވަނީ ފިޔަވަޅުތަކެއް އަޅަން ނިންމާފައިވާކަމަށް ވިދާޅުވެފައެވެ.

އެމަނިކުފާނުގެ ޕޯސްޓް މީސްމީޑިޔާގައި ހިއްސާ ކުރެއްވުމަށްފަހު ސަރުކާރުގެ އިސް ފަޑީގައި ތިއްބަވާ ފަރާތްތަކުން އަންނަނީ އެމަނިކުފާނަށް ސަނާ ކިޔަމުންނެވެ.

ވައްޑެ އޭނާގެ ޕޯސްޓްގައި ވިދާޅުވެފައިވަނީ ޚަރަދު ކުޑަކުރުމުގެ ފިޔަވަޅުތަކުގެ މައްޗަށް ސަނާ ތައުރީފުކޮށް، ރަސްމީ މަސައްކަތެއް ނުކޮށް ސޯޝަލް މީޑިޔާގައި ރައީސް މުއިއްޒަށް ސަނާކިޔަން ބޮޑެތި ވަޒީފާ ދީފައި ތިބި ފަރާރްތައް ގިނަ ކަމަށެވެ.

ވައްޑެގެ އިތުރުން ގިނަ ބަޔަކު އަންނަނީ ސަރުކާރަށް ފާޑުކިޔުން އަމާޒުކުރަމުންނެވެ.