ރައީސް އަބްދުﷲ ޔާމީންއާ މެދު ދިވެހިރާއްޖޭގެ ޖުޑިޝަރީއިން ގެންދަނީ ބޭއިންސާފުން ކަންކަން ކުރަމުން ހާމަވެފައިވާ ކަމަށާ އެކަމާ މެދު ބިރުވެތިވުމަށް އެމަނިކުފާނުގެ އިސް ގާނޫނީ ވަކީލު ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ. ޖަމީލު މިފަދައިން ވިދާޅުވީ، ހޮނިހިރު ދުވަހުގެ ރޭ ރައީސް ޔާމީން އަލަށް އުފައްދަވާ ޕާޓީ ޕީޕަލްސް ނެޝަނަލް ފްރޮންޓް(ޕީއެންއެފް)އިން ފްރޮންޓު އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ޑރ. ޖަމީލު ވިދާޅުވީ، ތަނެއްގެ އަދުލާ އިންސާފު ގެއްލިއްޖެ ނަމަ އެ ތަނެއްގެ ހަމަޖެހުން ގާއިމުކުރުމަކީ އުނދަގޫ ކަމަކަށް ވާނެ ކަމަށާ މިއަދު ރާއްޖެއިން ފެންނަމުން ދަނީ އެ މަންޒަރު ކަމަށެވެ. އެގޮތުން ރައީސް ޔާމީން މިނިވަންކުރާނެ ކަމުގެ ވައުދާ އެކު އައި ސަރުކާރުން އެކަން ހަނދާން ނައްތާލާ ރައްޔިތުންނަށް ވީ އެތައް ވައުދުތަކެއްވެސް ނުފުއްދާ ގެންދަނީ ހަރާންކޯރުވަމުންކަން ފާހަގަކުރައްވާ ޑރ. ޖަމީލު ވިދާޅުވީ، އަނިޔާ ލިބިގެންވާ މީހާގެ ދުއާ އަކީ އަބަދުވެސް ﷲގެ ހަޟްރަތުގައި އެންމެ އިޖާބަކުރުން އަވަސް ދުއާތަކުގައި ހިމެނޭ އެއްޗެއްކަން ހަނދާން ނައްތާނުލުމަށް ވެސް އިލްތިމާސްކުރައްވާ ކަމަށެވެ.

ޑރ. ޖަމީލު މީގެ އިތުރުން ޑރ ޖަމީލް ވިދާޅުވީ އެބޭފުޅުން މިތިބީ ރައީސް ޔާމީން ގެ ތަރައްގީ ގައުމަށް އަނބުރާ ގެނައުމުގެ މަސައްކަތް ކުރަން ކަމަށެވެ. އަދި ހަމައެހެންމެ މީގެ ކުރިން ވަރަށް ގިނަ ވެރިން އައިސް ހިނގައްޖެކަމަށާއި އެހެންނަމަވެސް ކަންކަމުގައި ހަގީގީ ކުލަ ޖެއްސެވީ ރައީސް ޔާމީން އެކަނި ކަމަށެވެ.

ރައީސް ޔާމީންއަށް ކޮށްފައިވާ ހުކުމުގެ މައްސަލަ ލަސްވަމުންދާތީ ގިނަ ބަޔަކު ގެންދަނީ ފާޑުކިޔަމުންނެވެ. އަދި ބުނަމުންދަނީ އެންމެ ފުރަތަމަ ވީ ވައުދު ރައީސް މުއިއްޒުއަށް ނުފުއްދުމުން އޮތް އިތުބާރު ގެއްލިފައިވާ ކަމަށެވެ.