މި ސަރުކާރުގެ އެންމެ ބޮޑު މަޝްރޫޢުއެއް ކަމަށްވާ ފުށިދިއްގަރުފަޅު ހިއްކުމުގެ މަޝްރޫޢު ހުއްޓާލުމަށްފަހު އަނެއްކާވެސް ފަށައިފިއެވެ.

2023 ވަނަ އަހަރުގެ ޑިސެމްބަރު މަހުގެ 18 ވަނަ ދުވަހު ފުށިދިއްގަރުފަޅަށް "ރަސްމާލެ" ގެ ނަމުން ނަންދީފައި ރައީސް ޑރ މުހައްމަދު މުއިއްޒުގެ ސަރުކާރުން އެ ސަރަހައްދު ހިއްކަން ފެއްޓެވިއެވެ.

އެ ދުވަހު އެ މަޝްރޫއު ރަސްމީގޮތުން ފައްޓަވަމުން އެމަނިކުފާނު ވިދާޅުވީ 8 މަސް ދުވަސް ތެރޭ ހިއްކާ ނިންމަވާނެ ކަމަށެވެ.

އެ މަޝްރޫޢުއަށް ކަނޑައެޅި ބަޖެޓް މިދިޔަ މަޖިލީހުން ފާސްނުކުރުމުން "ރަސްމާލެ" ހިއްކާ ނިންމާނީ ދައުލަތުގެ ބަޖެޓުން ނޫންކަމަށް ވެސް ރައީސް މުއިއްޒު ވިދާޅުވިއެެވެ.

ރަސްމާލެ ހިއްކަން ފެށިތާ މާގިނަ ދުވަހެއް ނުވެ ދެން އަޑުއިވިގެން ދިޔައީ "ރަސްމާލެ" ހިއްކުމުގައި ކޮރަޕްޝަން ހިމެނޭތީ އެންޓި ކޮރަޕްޝަން ކޮމިޝަން (އޭސީސީ) އިން ކޮރަޕްޝަންގެ މައްސަލައެއް ބަލަމުންގެންދާ ވާހަކައެވެ.

އެޔަށްފަހު ދެން އަނެއްކާ އަޑުއިވިގެން ދިޔައީ ރަސްމާލެ ހިއްކުން މަޑުޖެހިފައިވާ ވާހަކައެވެ. މިކަން މިގޮތައް އޮއްވާ އަނެއްކާވެސް ރަސްމާލެ ހިއްކަން ފައްޓަވާނެ ކަމަށް 23 ޖޫންގައި ޕީއެންސީ ޖަގަހަ ހުޅުވި ރަސްމިއްޔާތުގައި ވާހަކަދައްކަވަމުން ރައީސް މުއިއްޒު ވިދާޅުވިއެވެ.

މިއަދު ރަސްމާލެ ހިއްކަން މިވަނީ އަނެއްކާވެސް ފަށާފައެވެ. މީސްމީޑިޔާގައި މިވަގުތު ފެންނަނީ ސަރުކާރުގެ ނައިބުންތައް ރައީސް މުއިއްޒު ވައުދު ފުއްދަވައިފި ކަމަށް ވިދާޅުވެ ސަނާ ކިޔަމުންގެންދާ މަންޒަރެވެ. ސުވާލަކީ މި ފަހަރު ކިހާ ދުވަހަކަށް ހިއްކާފައި ހުއްޓާނެބާއެވެ.