ރައްޔިތުންގެ މަޖިލީހުގައި އޮތް މައިނޯރިޓީއަށް، ރައީސް މުހައްމަދު މުއިއްޒު، މަޖިލީހުގައި ތިއްބެވި ޕީއެންސީ މެމްބަރުން ލައްވާ ބިރު ދައްކަމުންދާ ކަމަށް އެމްޑީޕީގެ ޕާލިމަންޓްރީ ގްރޫޕުން ހާމަކޮށްފިއެވެ.

އެމްޑީޕީގެ ޕާލިމަންޓްރީ ގްރޫޕުން މިކަން ހާމަކޮށްފައިވަނީ މިއަދު މަޖިލީހުގައި ބޭއްވި ނޫސްވެރިންގެ ބައްދަލުވުމުގައެވެ.

މި ސަރުކާރުގެ ސިޔާސީ މަގާމުތަކުގައި ތިބި މީހުންގެ އަދަދާއި ސަރުކާރުގެ ކުންފުނިތަކުން މުސާރައަށް ހޭދަކުރާ މިންވަރު ހާމަ ކުރަން ލާޒިމުވާ ގޮތަށް އެމްޑީޕީގެ ފަރާތުން ހުށަހެޅި ކުއްލި މައްސަލަ ބޭރުކޮށްލުމުން އެކަމާ ކަންބޮޑުވުން ފާޅުކޮށް އެ ނޫސްވެރިންގެ ބައްދަލުވުމުގައި އެމްޑީޕީ ޕީޖީ ގްރޫޕުގެ ލީޑަރު މައުރޫފު ޒާކިރު ވިދާޅުވީ މައުލޫމާތު ހާމަކަން ބޮޑުކޮށް އެނގޭނެ ސަރުކާރަކަށް އެމަނިކުފާނުގެ ސަރުކާރު ވާނެ ކަމަށް ރައީސް މުއިއްޒު ވިދާޅުވިއިރު މިއަދު ސިޔާސީ މަގާމުތަކުގެ ތަފްސީލު ހޯދަން އެދި ހުށަހެޅި ބިލު ސަރުކާރުން ބޭރުން ކޮށްލުމާ އެކު ރައީސް މުއިއްޒު ގާނޫނާ ޚިލާފުވެފައިވާ ކަމަށެވެ.

އޭނާ ހާމަކުރި ގޮތުގައި ޕީއެންސީގެ މަޖިލިސް މެމްބަރުން ވަނީ މަޖިލީހުގެ ތަޅުމުގައި އެމްޑީޕީ މެމްބަރުންނަށް ބިރު ދައްކާފައިކަމަށާ އެގޮތުން އެ މެމްބަރުން ޖަލަށްލާ ބަންދުކުރާނެކަމުގެ އިންޒާރު ފަދަ އިންޒާރުތައް ދީފައިވާ ކަމަށެވެ.

މައުރޫފު ތުހުމަތުކުރާ ގޮތުގައި މަޖިލީހުގައި ޕީއެންސީ މެމްބަރުން އަމަލުކުރަމުން ގެންދަނީ ވެސް ސީދާ ރައީސް މުއިއްޒުގެ އަމުރަސެވެ. އަދި އެ މެމްބަރުން ވާހަކަ ދައްކަން ޖެހޭ ޕޮއިންޓްތައް ވެސް ފޮނުވަނީ ސީދާ ރައީސް އޮފީހުންކަމަށް މައުރޫފު ތުހުމަތު ކުރެއްވިއެވެ. އަދި ވިދާޅުވީ ރައީސް މުއިއްޒު ގެންދަވަނީ މަޖިލީހަށް ވަރަށް ބޮޑަށް ނުފުޒުފޯރުވަމުންކަން އެފަދަ ކަންކަމުން ހާމަވާ ކަމަށެވެ.

މީގެ އިތުރުންގައުމުގެ މާލީ ހާލަތު ސަރުކާރުން ދަންނަވާ ހާލަތުގައި އޮތްނަމަ ކަންކަން ކުރައްވަން ވާނީ ތަރުތީބުން ކަމަށެވެ. އެގޮތުން ރައްޔިތުންގެ އެންމެ އަސާސީ ކަންކަން އުނިކޮށް، ޓެކްސް ބޮޑުކުރުމުގެ ބަދަލުގައި ސިޔާސީ މުވައްޒަފުންގެ އަދަދު މަދުކޮށް އެމީހުންގެ މުސާރަ ކުޑަކުރުމަކީ އަޅަންޖެހޭ އެންމެ ފުރަތަމަ ފިޔަވަޅުކަމަށް މައުރޫފު ވިދާޅުވިއެވެ.