ހުރިހާ ވެސް މައްސަލައަކީ ރައީސުލްޖުމްހޫރިއްޔާ ޑރ މުހައްމަދު މުއިއްޒަށް ދައުލަތް ހިންގަން ނޭނގުން ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

ޑރ ޖަމީލް މިފަދައިން ވިދާޅުވެފައިވަނީ އެމަނިކުފާނުގެ އެކްސް ހޭންޑަލްގައި ކުރެއްވި ޕޯސްޓެއްގައެވެ.

އެ ޕޯސްޓްގައި އެމަނިކުފާނު ވަނީ ވަރަށް ބައިވަރުކަންކަމަށް އިޝަރާތްކުރައްވާ ސުވާލުތަކެއް ވެސް އަމާޒުކުރައްވާފައެވެ.

އެގޮތުން ސަރުކާރު ބޮޑުކޮށްގެން އުޅުއްވާ ސަބަބު ވެސް ހާމަކޮށްދިނުމަށް ޑރ ޖަމީލް ވަނީ ގޮވާލާފައެވެ.

ބޭރުގެ އެމްބަސީތައް ކުޑަ ނުކުރައްވާ ސަބަބަކީ ކޮބައިތޯ އައްސަވާ އެމަނިކުފާނު ވަނީ ރައީސް މުއިއްޒަށް ވަރުގަދަ ސުވާލެއް އަމާޒުކުރައްވާފައެެވެ.

އޭގެއިތުރުން މަޖިލިސް ރައީސް އަބްދުއްރަހީމް އަބްދުﷲ (އަދުރޭ) ގެ މުޅި އާއިލާ އަށް ސަރުކާރުގެ މަގާމްތައް ދިނުމަށްފަހު މިލިއަނުން ޚަރަދުކުރައްވާކަމަށް ވެސް ޑރ ޖަމީލް ވަނީ ތުހުމަތުކުރައްވާފައެވެ.

ސަރުކާރުގެ ވުޒާރާތަކާއި ކުންފުނިތަކުގައި މަސައްކަތް ކުރަން އައްޔަންކޮށްފައިވާ ސިޔާސީ މަގާމްތަކުގައި ތިއްބަވާ ފަރާތްތައް ފެންނަނީ އޮފީހަށް ވަދެ، ސޮއިކޮށްފައި ކޮފީތަކަށް އަރާ މަންޒަރުކަމަށް ވެސް ޑރ ޖަމީލް ވިދާޅުވިއެވެ.

މަތިބަރު ސަރުކާރެއް ކަމަށް ޑރ ޖަމީލް ފާހަގަކުރައްވާފައިވާއިރު ގިނަ ބަޔަކު އަންނަނީ މި ސަރުކާރުގެ މަތިބަރު ވާހަކަ ދައްކަމުންނެވެ.

ޚަރަދު ކުޑަކުރުމުގެ ސިޔާސަތެއް ރައީސް މުއިއްޒު ފެއްޓެވި ނަމަވެސް ފެނިގެންދަނީ ސަރުކާރުގެ އެކި އެކި ސިޔާސީ މަގާމްތަކަށް މީހުން އައްޔަން ކުރައްވާ މަންޒަރެވެ.