ދައުލަތުގެ ހަރަދު ކުޑަކުރަން ނިންމާފައިވާ ކަމަށް ރައީސް ޑރ މުހައްމަދު މުއިއްޒު އިއުލާނުކުރެއްވި ނަމަވެސް، ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު މުހައްމަދު ނިހާދު ޓޫރިޒަމް މިނިސްޓްރީގެ ސްޓޭޓް މިނިސްޓަރުގެ މަގާމަށް އައްޔަންކޮށްފިއެވެ.
މައުލޫމާތު ލިބުނުގޮތުގައި ނިހާދު މި މަގާމަށް އައްޔަންކޮށްފައިވަނީ މިދިޔަ ހަފްތާ ތެރޭގައެވެ.
ސްޓޭޓް މިނިސްޓަރަކަށް ނިހާދު އައްޔަންކޮށްފައިވާއިރު ސްޓޭޓް މިނިސްޓަރަކަށް މުސާރައާއި އިނާޔަތްތަކުގެ ގޮތުގައި މަހަކު 43,500ރ. (ސާޅީސް ތިންހާސް ފަސް ސަތޭކަ) ދައުލަތުގެ ބަޖެޓުން ހަރަދުކުރެއެވެ. އެއީ އަހަރަކަށް ބަލާނަމަ 5،22،000ރ. (ފަސް ލައްކަ ބާވީސް ހާސް) ރުފިޔާއެވެ.
ސިޔާސީ މަގާމުތަކަށް މީހުން އައްޔަންކުރުން މަޑުޖައްސާލާނެ ކަމަށް ރިޔާސީ ބަޔާން އިއްވަމުން މީގެ ފަސް މަސް ކުރިންވެސް ރައީސް މުއިއްޒު ވައުދުވެވަޑައިގެންނެވިއެވެ.
ނަމަވެސް އޭގެފަހުން އެތައް ސިޔާސީ މުވައްޒަފުންނެއް ވަނީ އައްޔަންކުރައްވާފައިކަން ފާހަގަކޮށްލެވެއެވެ.
އެމްޑީޕީގެ ވެރިކަން ނިމުމާއެކު އެ ޕާޓީ ދޫކޮށް ޕީއެންސީއާ ގުޅުނު މަޖިލީހުގެ 13 މެމްބަރުންގެ ތެރެއިން އެއް މެންބަރަކީ ނިހާދެވެ.
މި ސަރުކާރުން ވެރިކަމަށް އައީ ސިޔާސީ މަގާމްތަކުގެ އަދަދު 700 އަށްވުރެ މަތި ނުކުރާނެ ކަމުގެ ވައުދާއެކުގައެވެ.
ނަމަވެސް ފެނިގެންދަނީ ނުކަތާ ވަރަށް ސަރުކާރުގެ އެކި އެކި ވުޒާރާތަކަށާއި ކުންފުނިތަކަށް މީހުން އައްޔަންކޮށް ރައްޔިތުންގެ ފައިސާއިން ބޮޑެތި މުސާރަ ދެމުންދާ މަންޒަރެވެ.
