ލާމަރުކަޒީ ނިޒާމަށް ބަދަލު ގެންނަވާނެ ކަމަށް ވިދާޅުވުމުން އާންމުން ނުރުހުން ފާޅުކޮށްފިއެވެ.
ހައުސް އޮފް ޕީއެންސީގައި އެ ޕާޓީން ބޭއްވި ޖަލްސާގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ މުހައްމަދު މުއިއްޒު ލާމަރުކަޒީ ނިޒާމަށް ބަދަލު ގެނައުމަށް ރާވާ ކަމަށް ބުނެ ދެއްކެވި ވާހަކަފުޅާ ގުޅިގެން އާންމުންގެ މެދުގައި ކަންބޮޑުވުން އުފެދިފައިވާކަން ފާހަގަކުރެވިފައިވެއެވެ.
މިގޮތުން ކައުންސިލުތަކުގެ އަދަދާއި ކައުންސިލަރުންގެ އަދަދު މަދުކުރުމަށް ގާނޫނަށް އިސްލާހު ގެނައުމަށް ވިސްނާވަޑައިގަންނަވާ ކަމަށް ޖަލްސާގައި ވަނީ ހާމަކޮށްފައެވެ. މިކަމާއި ގުޅިގެން ގިނަ އަދަދެއްގެ ކައުންސިލުތަކުން ކަންބޮޑުވުން ފާޅުކޮށް މިއީ އަތޮޅުތަކަށް ލިބިފައިވާ ބާރުވެރިކަން ނިގުޅައިގަތުމަށް އަޅާ ފިޔަވަޅެއް ކަމަށް އަންނަނީ ބުނަމުންނެވެ.
ސަރުކާރުން މި ބަދަލު ގެންނަން އުޅެނީ ޚަރަދު ކުޑަކުރުމުގެ ސިޔާސަތުގެ ދަށުން ކަމަށް ބުނި ނަމަވެސް، ގިނަ ރައްޔިތުން ޝަކުވާ ކުރަނީ އަދިވެސް ސިޔާސީ މަގާމުތައް އިތުރުކުރަމުންދާތީ އާއި ބޮޑެތި މުސާރައިގައި އައާ ސިޔާސީ މަގާމުތަކަށް މީހުން ނަގަމުންދާ މައްސަލައިގައެވެ.
މީގެ އިތުރުން، އަތޮޅުތެރޭގެ ރަށްތަކަށް މި ސަރުކާރުން އެއްވެސް ހަރުދަނާ ސިޔާސަތެއް ނެތް ކަމަށާއި ސަރުކާރުގެ މި ނިންމުމާ ދެކޮޅަށް އެކި ގޮތްގޮތުން އިހުތިޖާޖު ކުރުމަށް ގިނަ ބަޔަކު ތައްޔާރުވަމުންދާ ކަމަށްވެސް މަޢުލޫމާތު ލިބެއެވެ.
