ރައީސް ޑރ. މުހައްމަދު މުއިއްޒުއަށާ ސަރުކާރަށް އަމާޒުވަމުންދާ ކޮރަޕްޝަންގެ އެކި ތުހުމަތުތަކާ އެކުވެސް ގާނޫނީ އިދާރާތަކާ ތަހުގީގީ އިދާރާތަކުގެ ވެރިން ހަނު ތިއްބަވާތީ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދުގެ ސުވާލެއް އަމާޒުކުރައްވައިފިއެވެ.

ޑރ. ޖަމީލުގެ ސުވާލު އަމާޒުކުރެއްވީ އެކްސްގައި ކުރެއްވި ޕޯސްޓެއްގައެވެ.

ރައްޔިތުންގެ މަޖިލީހުގައި ވެރިކަން ހިންގާ ޕީއެންސީ ތަމްސީލު ކުރާ މެންބަރުންނަށް "ރައީސް ޑރ. މުހައްމަދު މުއިއްޒުގެ ފަރާތުން" ކޮންމެ މަހަކު ބައި ލައްކަ ރުފިޔާ ދެއްވަމުންދާ ކަމުގެ އަޑޫތައް ގަދަވެފައިޥާއިރު މި މަހުވެސް އެ ފައިސާ ދިފައިވާ ކަމަށް "އަދަދު" ނޫހުގައި ވަނީ ރިޕޯޓުކޮށްފައެވެ.

އެ ޚަބަރު ހިއްސާކުރައްވާ ޑރ. ޖަމީލު ވިދާޅުވެފައިވަނީ، ބްލަޑް ޕްރެޝަރ އާ ހަކުރު މައްޗަށްދާތީ އެ ބަލިން ސަލާމަތް ވުމުގެ ގޮތުން ލޮނު އެއްޗިއްސާ ފޮނި އެއްޗެހި ބޭނުން ކުރުން މީސް މީހުން ދޫކޮށްފައިވާ ކަމަށެވެ. ނުވަތަ ކެއުމުގެ އާދަތައެް ބަދަލުކޮށްފައިވާ ކަމަށެވެ. ނަމަވެސް الله އަށް ބިރުވެތިވެ ރިޝްވަތުގެ އަމަލާ ޙަރާމް އެއްޗެހި ކެއުން އަދިވެސް ދޫކޮށް ނުލާކަމަށާ އެގޮތުން ރައިސް މުޢިއްޒުގެ އެ އަމަލު އެއްވެސް ޑިމޮކްރަސީއެއްގައި ޖިނާއީ ކުށެއްގެ ގޮތުގައި ނޫނީ ނުބަލާނެކަމަށް ވެސް ޑރ. ޖަމީލު ވަނީ ވިދާޅުވެފައެވެ. އަދި ޑރ. ޖަމީލުވަނީ މުއިއްޒުއަށާ ސަރުކާރަށް އަމާޒުވަމުންދާ ކޮރަޕްޝަންގެ އެކި ތުހުމަތުތަކާ އެކުވެސް ގާނޫނީ އިދާރާތަކާ ތަހުގީގީ އިދާރާތަކުގެ ވެރިން ހަނު ތިއްބަވާތީ، ގާނޫނުގެ ދިގު އަތް އަދި ތަޙްގީގީ އިދާރާތައް ކޮބައިތޯ އައްސަވާ ސުވާލެއް ވެސް އަމާޒުކުރައްވާފައެވެ.

ޕީއެންސީގެ މަޖިލިސް މެންބަރުންނަށް ކޮންމެ މަހަކު ފައިސާ ދޭން ނިންމިކަން ރައީސް މުއިއްޒު އިއުލާނު ކުރެއްވީ މުލިއާގޭގައި މެއި 22، ގައި ބޭއްވި ބައްދަލުވުމުގައި ކަމަށް ރިޕޯޓުކޮށްފައިވެއެވެ. އެގޮތުން މި މަހުވެސް ބައިލައްކަ ރުފިޔާ ކޮންމެ މެމްބަރަކަށް ނަގުދު ފައިސާއިން ދީފައިވާކަމަށް ވަނީ ރިޕޯޓުކޮށްފައެވެ.

ސަރުކާރުން މީގެ ކުރިން ވަނީ ޕީއެންސީގެ މެންބަރުންނަށް "މުލިއާގެއިން މަހަކު 50،000ރ. ދޭ" ވާހަކަ ދޮގު ކޮށްފައެވެ.