ގައުމުގައި ކަންކަން ކުރަން ފައިސާ ނެތިގެން ވެސް ގައުމުގެ މައި ބަނދަރުތައް ވިއްކާލުމަކީ ބަލައިގަނެވޭނެ ކަމެއް ނޫން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ދަ ފްރޮންޓް އޮފް އޮފީހުގައި ބުރާސްފަތި ދުވަހުގެ ރޭ ބޭއްވި ޓައުން ހޯލް ޖަލްސާގައި ވާހަކަފުޅު ދައްކަމުން، ރައީސް ޔާމީން ވިދާޅުވީ، ގައުމާ މެދު ވެރިއަކު ވިސްނަން ޖެހޭނީ ހަމައެކަނި އިގްތިސޯދީ ނަޒަރުން ނޫން ކަމަށާ އެ ވެރިއަކު ގައުމުގެ މުސްތަގުބަލާ މެދުވެސް ފުންކޮށް ވިސްނާ ކަންކަންކުރި މަގަށް ބައްޓަން ކުރަން ޖެހޭ ކަމަށެވެ.

އެހެންކަމުން މާލޭގެ ޕޯޓު ފިލިޕިންސްގެ ކުންފުންޏަކަށް ދިގު މުއްދަތަކަށް ދިނުމަކީ ޖީއެމްއާރަށް އެމްޑީޕީއިން އެއާޕޯޓު ދޫކޮށްލުމާ އެއްފަދަ ކަމެއްގެ ގޮތުގައި ރައީސް ޔާމީން ސިފަކުރެއްވިއެވެ.

އެމަނިކުފާނު ވިދާޅުވީ، ލިކިއުޑީޓީ ނެތިގެން މާލޭ ކަނޑުގެ ބަނދަރު ވިއްކާލުމަކީ އުފެއްދުންތެރިކަން އިތުރުވާނެ ކަމެއް ނޫން ކަމަށާ އޭގެ ސަބަބުން ގައުމު ހުށަހެޅިގެން ދާނީ އިތުރު ނުރައްކަލަށް ކަމަށެވެ. އެގޮތުން އެމަނިކުފާނު ވިދާޅުވީ ބަނދަރު ވިއްކާލުމާ އެކު އެތަނަށް ދިވެހިންނަށް ބާރު ނުފޯރުވޭނެ ކަމަށާ އެހެންކަމުން ބަނދަރަށް ހަތިޔާރާ އެކު މަނަވަރުތައް އަޔަސް އެކަމަށް ދިވެހި ސަރުކާރަށް ބާރު ނުފޯރުވޭނެ ކަން ވެސް ރައީސް ޔާމީން ފާޙަގަކުރެއްވިއެވެ.

ރައީސް ޔާމީން ވިދާޅުވީ ބަނދަރު ވިއްކާލާ ހިސާބުން އަމާން ދިވެހިރާއްޖޭގެ ނަސީބު ދިވެހިން އަތުން ގެއްލިގެން ދާނެ ކަމަށެވެ.