ދަރަނި ބޮޑުވެފައި އޮތުމުން ގައުމު ނުހިންގިގެން ރައީސް މުހައްމަދު މުއިއްޒު ބަހަނާ ދައްކަވަމުންދާތީ ރައީސް އަބްދުﷲ ޔާމީން އެ ވާހަކަފުޅަށް ރައްދު ދެއްވައިފިއެވެ.
ބުރާސްފަތި ދުވަހުގެރޭ ދަ ފްރޮންޓް އޮފީހުގައި ބޭއްވި ޓައުން ހޯލް ޖަލްސާގައި ރައީސް ޔާމީން ވަނީ ގައުމުގެ ދަރަންޏާ ހުރެ ދައުލަތް ނުހިންގިގެން އުޅެން ނުޖެހޭނެކަން ސާބިތުކޮށްދެއްވާފައެވެ.
އެގޮތުން ރައީސް ޔާމީން ވިދާޅުވީ އެމަނިކުފާނުގެ ފަސް އަހަރުގެ ދައުރާ ކުރިމަތިލީ އިރު އެމްޑީޕީ ސަރުކާރުން ދޫކޮށްފައި ދިޔަ 28 ބިލިއަންގެ ދަރަނި އޮތް ކަމަށާ އެހެންކަމުން އެ ދަރަނި ދެއްކުމަށް ފަހު އެމަނިކުފާނުގެ ފަސް އަހަރަށް ޖެހިފައި އޮންނާނީ 6 ބިލިއަންގެ ދަރަނި ކަމަށާ ނަމަވެސް ޖީއެމްއާރު އަތުން އެއާޕޯޓު ހޯދަން ވެސް 320 މިލިއަން ޑޮލަރު ހޭދަކުރަން ޖެހުނު ކަން ވެސް އެމަނިކުފާނު ފާހަގަކުރެއްވިއެވެ.
އެމަނިކުފާނު ވިދާޅުވީ، އެ ހުރިހާ ދަރަނި ދެއްކުމަށް ފަހުވެސް އެމަނިކުފާނު ވާނީ ގައުމަށް އުމްރާނީ ތަރައްގީ ގެނެސްދެއްވާފައިކަން ވެސް ރައީސް ޔާމީން ވިދާޅުވިއެވެ.
އެ ދަރަނިތައް ދެއްކުމަށް ފަހު ފަސް އަހަރު ނިންމާލިއިރު ދިވެހިންނަށް އުފާވެރިކަން ވެސް ގެެނސްދިނިން. ގައުމުގައި ނެތް ވަރުގެ ހޮސްޕިޓަލަކާ ބުރިޖަކާ މިހެން ގޮސް އުމްރާނީ ބޮޑެތި ތަރައްގީ ހުންނާނީ ގެނެސްދީފައި. އެހެންކަމުން ދަރަނި ބަހަނާއަކަށް ދެއްކޭކަށް ނެތް.
ރައީސް ޔާމީން
ރައީސް ޔާމީން ވަނީ އެމްޑީޕީ ސަރުކާރުގެ ދަރަނީގެ ވާހަކަ ދައްކާއިރު އެ ދަރަނި ނަގައިގެން ރައްޔިތުންނަށް ކޮށްދިން ކަމެއް އޮތްތޯ ނުވަތަ އެ ފައިސާ ހޭދަ ކުރީ ކިހިނަކުންތޯ ބަލަން ޖެހޭ ކަމަށް ވިދާޅުވެފައެވެ.
