ގައުމުގެ އިގްތިސޯދީ ހާލަތު ދަށްކަމާ ހައްލުކުރަން ސަރުކާރުން މަސައްކަތްނުކުރާ ވާހަކަ ރައީސް އަބްދުﷲ ޔާމީން ދައްކަވާތީ އެކަން ރައްޔިތުންނަށް އޮޅުވާލުމަށް ޓުއަރިޒަމް މިނިސްޓަރު އިބްރާހިމު ފައިސަލް ދެއްކެވި ވާހަކަތަކަށް ރައީސް ޔާމީންގެ ވަރުގަދަ ސުވާލެއް އަމާޒުކުރައްވައިފިއެވެ.

ބުރާސްފަތި ދުވަހުގެ ރޭ ދަ ފްރޮންޓު އޮފީހުގައި ކުރިއަށް ދިޔަ ޓައުން ހޯލު ޖަލްސާއާ އެކު ޕީއެންސީ ހައުސްގައި ވެސް އެރޭ ޖަލްސާއެއް ކުރިއަށް ގެންދިޔައެވެ. އެ ޖަލްސާގައި ފައިސަލް ވަނީ ނުސީދާކޮށް ރައީސް ޔާމީނަށް ވަރަށް ބޮޑަށް ފާޑު ވިދާޅުވެފައެވެ.

އެންމެ ބޮޑަށް ފާޑު ވިދާޅުވީ ގައުމުގެ އިގްތިސާދީ ހާލަތު ސާފުކޮށް ދެއްވާ އެ މަނިކުފާނު ދައްކަވާ ވާހަކަފުޅަށެވެ.

ރައީސް ޔާމީންނަށް އިޝާރާތް ކުރައްވާ ފައިސަލް ވިދާޅުވެފައިވަނީ "އިގްތިސާދު" އެނގިވަޑައިގަންނަވަނީ އެންމެ ބޭފުޅެއް ކަމަށް ބޭފުޅަކު ދައުވާ ކުރައްވާ ކަމަށެވެ. އަދި އެކަމާ ތައުލީމީ ޒުވާނުން ހީނ މަލާމަތް ކުރާ ކަމަށެވެ.

މި ސަރުކާރުން އިގްތިސާދު ހަމަމަގަށް އެޅުވުމަށް ކުރާ މަސައްކަތުގެ ނަތީޖާ ފެންނަމުންދާ ކަމަށް ވެސް ފައިސަލް ވިދާޅުވެފައިވެއެވެ. އަދި ރައީސް ޔާމީނަށް އިޝާރާތް ކުރައްވާ ވިދާޅުވީ އެމަނިކުފާނު ހައްދަވަނީ ބުހުތާނު ދޮގު ކަމަށެވެ.

ފައިސަލްގެ ވާހަކަތަކަށް ރައްދު ދެއްވަމުން ރައީސް ޔާމީން ވިދާޅުވީ އެމަނިކުފާނު ހިސާބު އަކުރުން ދޮގެއް ހަދާފައި އޮތް ނަމަ ހެއްކާ އެކު އެކަން ދެއްކުމަށް ފައިސަލަށް ދަންނަވާ ކަމަށެވެ. އަދި ފައިސަލް ވިދާޅުވާހާ ގައުމުގެ އިގްތިސޯދީ ހާލަތު އަމާން ނަމަ ފިނޭންސުން ގައުމުގެ ހިސާބުތައް ހާމަކުރުން ހުއްޓާލާފައިވަނީ ކިއްވެތޯއާ ރައީށް މުހައްމަދު މުއިއްޒު ގައުމުގެ ހަރު މުދާ ވިއްކަނީ ކީއްވެތޯ ރައީސް ޔާމީން ވަނީ ސުވާލު ކުރައްވާފައެވެ.

ރައީސް ޔާމީން ވަނީ މިހާރު ގައުމުގެ ހާލަތު އޮތް ގޮތް އެއްވެސް އޮޅުވާލުމެއް ނެތި ސަރުކާރުން ރައްޔިތުންނަށް ކިޔައިދޭން ޖެހޭ ކަމަށް ވިދާޅުވެފައެވެ. އެއީ ސަރުކާރުން އިގްތިސޯދު އިތުރު ކުރަން ނިކަމެތި މީހާ އަތުން ނަގާ ޓެކްސްވެސް ބޮޑުކުރަން ނިންމާފައިވާތީ ކަމަށް ވެސް ރައީސް ޔާމީން ވަނީ ވިދާޅުވެފައެވެ.