ގއ މާމެންދޫ އަދި ނިލަންދޫއަށް ވިއްކި ތެލުގައި ފެން ހުރި ކަމަށް ބުނެ މޯލްޑިވްސް ފިއުލް ސަޕްލައި ބަދުނާމުވާ ގޮތަށް ފެތުރި ޚަބަރު އެ ކުންފުނިން ދޮގުކޮށްފިއެވެ.
އެގޮތުން އެފްއެސްއެމުން ނެރުނު ބަޔާނެއްގައި ބުނެފައިވަނީ، އެ ކުންފުނިން ގއ މާމެންދޫ އަށާ އެ އަތޮޅު ނިލަންދޫއަށް ވިއްކި ތެލުގައި ގިނަ އަދަދަކަށް ފެން ހުރި ކަމަށް ބުނެ މީސްމީޑިއާގައި ދައުރުވަމުންދާ ޚަބަރަކީ ދޮގު ޚަބަރެއްކަމަށެވެ.
މީގެ އިތުރުން އެ ކުންފުނިން ވިއްކާ ތެލަކީ ފެންވަރު ރަނގަޅު ތެޔޮކަން ޔަގީން ކޮށްދިނުމަށް ފެނަށް ޓެސްޓު ކުރެވޭނެ އިންތިޒާމުވެސް އެ ކުންފުނީގެ ބާޖުތަކުގައި ހުންނާނެ ކަމަށް ވެސް ބަޔާނުގައި އެފްއެސްއެމުން ހާމަކޮށްފައިވެއެވެ.
ތެޔޮ ގަނެގެން ވިއްކާ ފަރާތްތަކުންވެސް ގަވާއިދުތަކާއި އެއްގޮތަށް ތެޔޮ ރައްކާ ކުރުމުގެ އިންތިޒާމު ހަމަޖެއްސުމަށާ ކަމާ ބެހޭ ފަރާތްތަކުގެ ލަފައާއި އެއްގޮތަށް އަމަލު ކުރުމަށް ވެސް އެފްއެސްއެމުގެ ބަޔާނުގައި އިލްތިމާސްކޮށްފައިވެއެވެ.
