ފިއުލް ސަޕްލައި މޯލްޑިވްސް (އެފްއެސްއެމް) ގެ މެނޭޖިން ޑިރެކްޓަރަކަށް ފާތިމަތު އާޝާން މިއަދު އައްޔަނު ކޮށްފި އެވެ.

އެސްޓީއޯގެ ސަބްސިޑަރީ ކުންފުނި އެފްއެސްއެމްގެ ފުރަތަމަ އަންހެން މެނޭޖިން ޑިރެކްޓަރަކަށް އާޝާން އައްޔަނުކޮށްފައި ވަނީ މިއަދު އެވެ.

އެސްޓީއޯ އިން ބުނީ މިއީ އެކުންފުނީގެ ދަށުން ހިންގާ ސަބްސިޑަރީއެއްގެ އެންމެ އިސްވެރިއަކަށް އަންހެނަކު އައްޔަނު ކުރި ފުރަތަމަ ފަހަރު ކަމަށެވެ.

އެސްޓީއޯގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ އާޝާން މީގެކުރިން ވަނީ މިފްކޯގެ ޑެޕިއުޓީ ސީއީއޯގެ މަގާމު ވެސް ފުރުއްވާފަ އެވެ.

އެފްއެސްއެމަކީ އެސްޓީއޯގެ ސަބްސިޑަރީ ކުންފުންޏެކެވެ. އަދި އެކުންފުންޏަކީ އެސްޓީއޯއަށް އެންމެ ބޮޑު އާމްދަނީއެއް ލިބޭ ކުންފުންޏެވެ.

އާޝާން އަކީ 1994 ވަނަ އަހަރު އޮސްޓްރޭލިއާގެ ހޯބާޓް އިންސްޓިޓިއުޓް އޮފް ޓެކްނިކަލް އެންޑް ފާދާ އެޑިއުކޭޝަން އިން ބިޒްނަސް (އިންފޮމޭޝަން ޓެކްނޮލޮޖީ) ޑިޕްލޮމާ ހާސިލް ކުރައްވާފައިވާ ބޭފުޅެކެވެ. އޭނާ ވަނީ މެލޭޝިއާގެ ކޭޑީޔޫ ކޮލެޖުން 2003 ވަނަ އަހަރު ބިޒްނަސް އެޑްމިނިސްޓްރޭޝަން އިން މާސްޓާސް ހާސިލް ކުރައްވައިފަ އެވެ.

އެފްއެސްއެމްގެ އެމްޑީގެ މަގާމަށް އާޝާން އައްޔަންކޮށްފައި ވަނީ އެ މަގާމުގައި ހުންނެވި އިސްމާއީލް ސުހައިލް، މިދިޔަ ނޮވެންބަރު 26ގައި އިސްތިއުފާ ދެއްވުމާ ގުޅިގެންނެވެ.