މިދިޔަ އަހަރުގެ އޮކްޓޯބަރު މަހުގެ ހަތް ވަނަ ދުވަހު ފަލަސްތީނުގެ ޣައްޒާއަށް އިސްރާއިލުގެ ނިރުބަވެރިން ކޮންމެ ދުވަހު މެދު ކެނޑޫމެއް ނެތި ދެމުންދާ ވަރުގަދަ ހަމަލާތަކަށް ބަދަލެއް ނާންނައިރު އެ ހަމަލާތަކުގައި ކޮންމެ ދުވަހަކު 100 އަށް ވުރެ ގިނަ މީހުން ޝަހީދުވާކަން ހާމަވެއްޖެއެވެ.

އޮކްޓޯބަރު ހަތްވަނަ ދުވަހުން ފެށިގެން ފަލަސްތީނުގެ ޣައްޒާގެ ރައްޔިތުންނަށް ކޮންމެ ދުވަހެއްވެސް މި ފަހަކަސް އައިސް ވަނީ ބިރުވެރިކަމުން ފުރިފައިވާ ދުވަހެއްގެ ގޮތުގައެވެ. ނިރުބަވެރިންގެ ބޮމު ހަމަލާތަކާ މިސައިލް ހަމަލާތަކުން މުޅި ޣައްޒާ ފަނާވެ ސުންނާފަތިވަމުންދާއިރު، ނިރުބަވެރިންގެ ހިތުގައި ރަހުމުގެ ކަންފުޅެއްވެސް ނެތްކަން ފެންނަ މަންޒަރުތަކުން ހާމަވެއެވެ.

ގަތުލު އާންމަށް 100 އަށް ވުރެ ގިނަ ދުވަސްވެފައިވާއިރު، އެ ނިރުބަވެރި ހަމަލާތަކުގެ ޝިކާރައަކަށްވެ އެތައް ހާސް މައުސޫމު ކުޑަކުދިންނާ އަދި އުމުރުން ދުވަސް މީހުންގެ އިތުރުން އަންހެނުންވެސް ދަނީ ޝަހީދުވެ މީގެ އިތުރުން ޒަޚަމްތައްވެސް ވަމުންނެވެ. ކޮންމެ ދުވަހަކުވެސް ޣައްޒާގައި 100 އަށްވުރެ ގިނަ މީހުން ޝަހީދުކޮށްލާއިރު، މި މުއްދަތުގައި ޝަހީދުވި މީހުންގެ ޖުމްލަ އަދަދު މިހާރު 25،000 އަށްވުރެ މައްޗަށް އަރައިފިއެވެ. މީގެ ތެރޭގައި 10،000 އަށްވުރެ ކުޑަކުދިން ހިމެނެއެވެ.

ޣައްޒާގެ ހާލަތަށް ބަލާއިރު މުޅި ސަހަރުގެ ސާފުވައި ކިލަނބުވެފައިވަނީ އިސްރާއިލުގެ ހަނގުރާމަވެރިން ދޭ ހަމަލާތަކުގެ އަސަރުން ވެއްޓިފައިވާ އިމާރާތްތަކުގެ ހިރަފުހުންނެވެ. ނިރުބަވެރިންގެ ވައިގެ އަސްކަރިއްޔާ އިން ވަނީ ޣައްޒާގެ އުތުރުން އޮންނަ ޖަބަލިއާވެސ ވަރުގަދަ ހަމަލާތަކެއް ދީފައެވެ. މީގެ އިތުރުން ނާބްލުސް ގައި އޮންނަ އަލް-އައިން ކޭމްޕަށް ނިރުބަވެރިން އަރައި ހިސޯރުކޮށް ބަލާ ފާސްކުރުމުގެ އޮޕަރޭޝަން އެއް ހިންގަމުންދާ ކަަމށް މީޑިޔާ ރިޕޯޓުތައް ބުނެފައިވެއެވެ.

ޣައްޒާގެ ދެކުނުގެ ޚާން ޔުނިސްގައި ހުންނަ ނާސިރު މެޑިކަލް ކޮމްޕްލެކްސްއަށް އިސްރާއީލުން ދިން ބޮމުގެ ހަމަލާގައިވެސް އެތައް ބަޔަކު ޒަޚަމްވެފައިވެއެވެ. އުތުރު ޣައްޒާގެ ހަލަތަށް ބަލާއިރު އެހެން ހިސާބުތަކަށް ވުރެ އެ ސަރަހއްދުގެ ހާލަތު ގޯސްކަން ހާމަކޮށްފައިވެއެވެ. އެގޮތުން އެ ސަރަހައްދަސް އެހީ ފޯރުކޮށްދެވޭނެ ގޮތެއްވެސް އަދި ހޮސްޕިޓަލްތައް ވެސް ނެތްކަމަށް ވަނީ ރިޕޯޓުކޮށްފައެވެ.