ބަންގްލަދޭޝްގެ ސިވިލް ސާވިސް ވަޒީފާއަށް މީހުން ނެގުމުގެ ސިޔާސަތުތަކާ ދެކޮޅަށް ކުރަމުންގެންދާ މުޒާހަރާ އާއި ހަމަނުޖެހުންތަކާ ގުޅިގެން، ގައުމުގެ މަސްލަހަތު ގޯސްވެ އެ ގައުމުގައި ކާފިއު އިއުލާންކޮށްފިއެވެ.

ބަންގްލަދޭޝްގެ ސިވިލް ސާވިސް ވަޒީފާއަށް މީހުން ނެގުމުގެ ސިޔާސަތުތަކާ ދެކޮޅަށް އެ ގައުމުގެ ދަރިވަރުން ފެށި މުޒާހަރާ ހޫނުވެ، ފުލުހުންނާ ކުރިމަތިލައި، އިމާރާތްތަކުގައި ހުޅުޖަހާފައިވެއެވެ..

އެ ހަމަނުޖެހުންތައް ކޮންޓްރޯލް ކުރުމުގައި އެ ގައުމުގެ ފުލުހުން ފެއިލްވެފައިވާއިރު ހޮސްޕިޓަލްތަކާ ހަވާލާދީ އޭއެފްޕީގައި ބުނެފައިވާ ގޮތުން ހަމަނުޖެހުންތަކުގައި 100 އަށްވުރެ ގިނަ މީހުން ވަނީ މަރުވެފައެވެ.

އެހެންކަމުން ގައުމުގެ ކަންކަން ހަމަ މަގަށް އެޅުވުމަށް އެ ގައުމުގެ ސަރުކާރުން މިހާރުވަނީ ގައުމުގައި ކާފިއު އިއުލާންކޮށް، މަދަނީ އިދާރާތަކަށް އެހީތެރިވުމަށް ސިފައިން ނެރުމަށް ނިންމާފައިވާ ކަމަށް ބޮޑުވަޒީރު ޝައިހް ހަސީނާގެ ޕްރެސް ސެކްރެޓަރީ ނަޔީމުލް އިސްލާމް ހާން އާ ހަވާލާދީ އޭއެފްޕީގައި ހާމަކޮށްފައިވެއެވެ.

ބަންގްލަދޭޝްގައި ކުރަމުންދާ މުޒާހަރާތައް ހުއްޓުވަން ސަރުކާރުން ބާރުގެ ބޭނުން ކުރަމުންދާއިރު އިންޓަނެޓާއި މޯބައިލް ފޯނުގެ ހިދުމަތް ވަނީ ކަނޑާލައިފައެވެ.

ނަމަވެސް މުޒާހަރާ ކުރަމުންދާ ދަރިވަރުން ވަނީ މުޒާހަރާ ހުއްޓާ ނުލައި ކުރިއަށްދާނެ ކަމަށް ބުނެފައެވެ. އަދި އެ މީހުން ދަނީ މުޒާހަރާގައި މަރުވާ މީހުންގެ ޒިންމާ ސަރުކާރުން ނަގަންޖެހޭނެ ކަމަށާއި ޝައިހް ހަސީނާ ވަގުތުން އިސްތިއުފާ ދޭން ގޮވާލަމުންނެވެ.