ޣައްޒާގައި ޕޯލިއޯ ފެތުރެން ފަށައިފާނެކަމުގެ ބިރު ބޮޑުވެއްޖެއެވެ.

މިކަން ހާމަކޮށްފައިވަނީ، ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯއިންނެވެ.

އެ ޖަމްއިއްޔާއިން ވަނީ ޣައްޒާގެ ހެލްތު މިނިސްޓްރީއާ ނަރުދަމާގެ ނިޒާމުން ބޭރުވާ ނަޖިސް ފެނުގެ ސާމްޕަލްތަކެއް ނަގައިގެން ކުރި ޓެސްޓްތަކުން ޕޯލިއޯ އަށް މަގުފަހިކުރާ ވައިރަސް ފެނިފައިވާ ކަން ހާމަކޮށްފައެވެ.

އެގޮތުން މިދިޔަ މަހުގެ 23 ގައި ގާޒާގެ ހަ ސަހައްދަކުން ނެގިު ސާމްޕަލްތަކުން ޕޯލިއޯވައިރަސް ޓައިޕް ޓޫ ވީޑީޕީވީ2) ފެނިފައިވާ ކަމަށް ޑަބްލިއުއެޗްއޯއިން ހާމަކޮށްފައިވެއެވެ.

އެހެންކަމުން ހަނގުރާމައިގެ ސަބަބުން މިހާރު ޣައްޒާ އޮތް ހާލަތަށް ބަލާއިރު، އެތަނުގެ ސިއްހީ ހާލަތާ މެދު ވަރަށް ކަންބޮޑުވާ ކަމަށް ޑަބްލިއުއެޗްއޯ އިން ބުނެފައިވެއެވެ. އަދި އަަވަސް މުއްދަތެއްގެ ތެރޭގައި ޕޯލިއޯގެ ވައިރަސް ޣައްޒާއިން ނައްތާލަން މަސައްކަތްތަކެއް ކުރަން ޖެހޭ ކަމަށް އެ ޖަމްއިއްޔާއިން ހާމަކޮށްފައިވެއެވެ.

އެކަމަށް މަގު ފަހި ކުރުމަށް މިހާރު ޔުނިސެފާއި އަންރުވާގެ އިތުރުން ޣައްޒާގެ ސިއްހީ އިދާރާތައް ގުޅިގެން އަންނަނީ މަސައްކަތްކުރަމުން ކަމަށް ވެސް ވަނީ ހާމަކޮށްފައެވެ. އަދި ބަލި އެއްވެސް ވަރަކަށް މިހާތަނަށް ފެތުރިފައިވޭތޯ ވެސް އަންނަނީ ބަލަމުންނެވެ.

މިފަދަ ކާރިސާއެއް ޣައްޒާގައި ހިނގާފާނެކަމުގެ އިންޒާރު ލިބިފައިވާއިރު މިދިޔަ އަހަރުގެ އޮކްޓޯބަރު މަހުގެ 7 އިން ފެށިން އިޒްރޭލުން ފަލަސްތީނާ ދެކޮޅަށް ކުރަމުންދާ ހަނގުރާމައިގެ ޣައްޒާގެ އެކި ހިސާބުތައް ވަނީ ސުންނާތިކޮށްފައެވެ. މީގެ ސަބަބުން ފެނާއި ނަރުދަމާ ނަރުދަނާ ނިޒާމު ވެސް ހަލާކުވެ، ރައްޔިތުން ތިބީ އިންސާނީ ވަރަށް ބޮޑު ކާރިސާއެއްގެ ތެރޭގައެވެ. އަދި މިފަދަ ބަލިމަޑޫކަމެއް ފެތުރިއްޖެ ނަމަ ފަރުވާނެ ހޮސްޕިޓަލުތައް ވެސް ނެތެވ. އެހެނީ އިޒްރާއީލުން ވަނީ ފަލަސްތީނުގެ ހުރިހާ ހޮސްޕިޓަލްތަކެއްހެން ބިމާ ހަމަކޮށްފައެވެ. ހަމަ އެހެންމެ ފަލަސްތީނަށް އެހީ ފޯރުކޮށްދޭ ހުރިހާ ހުރަސްތަކެއް ބަންދުކޮށްފައިވާތީ ހޮސްޕިޓަލުތައް ހިންގުމަށް ބޭނުންވާ ތެޔޮވެސް ވަނީ ނުލިބިފައެވެ.