ސަހްޔޫނީންގެ ޕާސްޕޯޓުގައި ރާއްޖެއަށް އެތެރޭ ނުވެވޭނެ ގޮތަށް އެ ޕާސްޕޯޓު މަނާ ކުރުމަށްޓަކައި ގާނޫނަށް ގެންނަންޖެހޭ ބަދަލުތައް ގެންނަން ސަރުކާރުން ނިންމިކަމަށް ހާމަކުރި ނަމަވެސް އެކަން ނުކޮށް ފަސްކުރަމުންދާއިރު އެ ގައުމުގެ ފަތުރުވެރިން ދަނީ މެދުކެނޑުމެއް ނެތި ރާއްޖެ އަންނަމުންކަން ހާމަވެއްޖެއެވެ.

ނިމި ދިޔަ ހަފްތާގައިވެސް ސަހްޔޫނީން ފަތުރުވެރިންގެ ގޮތުގައި ރާއްޖެ އައިސްފައިވެއެވެ. އެގޮތުން ނިމިދިޔަ ހަފްތާގައި އެކަނިވެސް 80 އަށް ވުރެ ގިނަ ފަތުރުވެރިން ރާއްޖެ އައިސްފައިވެއެވެ.

އިޒްރޭލުގެ ޕާސްޕޯޓު މަނާކުރަން ވަޒީރުންގެ މަޖިލީހުން ނިންމާ އެކަން އިއުލާނުކުރީ ޖޫން 2، ގަ އެވެ. އޭގެ ފަހުން ދެ މަސްދުވަސް ވާން ކައިރިވެފައިވާއިރު، އަދިވެސް އެ ނިންމުމަށް ގާނޫނީ ބުރަދަނެއް ލިބިފައެއް ނުވެ އެވެ.

އިޒްރޭލު ޕާސްޕޯޓު މަނާކުރުމުގެ ވިސްނުމެއް ސަރުކާރުގައި ނެތްކަމަށާ ސަރުކާރުން ގެންދަނީ އެމެރިކާއަށް ބިރުން ސަހްޔޫނީންގެ ޕާސްޕޯޓު މަނާކުރުމަށް ފަސް ޖެހެމުން ކަމަށް ބުނެ ފާޑުކިޔަމުންނެވެ. ޕީއެންސީގެ ޕާލިމެންޓަރީ ގްރޫޕްގެ ލީޑަރު އިބްރާހިމް ފަލާޙް ވަނީ މިއީ ދެ ގައުމެއްގެ ހަނގުރާމައެއް ކަމަށާއި، ދިވެހިންނާ ބެހޭ ކަމެއް ނޫން ކަމަށް ބުނެފައެވެ. އަދި އެޓަރނީ ޖެނެރަލް އަހުމަދު އުޝާމްވެސް އިޒްރޭލު ޕާސްޕޯޓު މަނާކުރުން ރަނގަޅު ނޫން ކަމަށް ބުނެ އެކަމާމެދު އޮތް ސަރުކާރުގެ ސްޓޭންޑް ހާމަކޮށްފައި ވެއެވެ.