މާލިއްޔަތު ކޮމިޓީން ނިންމާފައިވާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ މަގާމުން އަލީ ހާޝިމް ވަކިކުރުމަކީ މާލީ ގޮންޖެހުންތަކަށް އޮތް ހައްލެއް ނޫން ކަމަށާއި ސަރުކާރުގެ ހަރަދުތައް ކުޑަކުރުމަށް އެ މައްސަލައިގެ ބަހުސްގައި ވާހަކަ ދެއްކެވި އިދިކޮޅު އެމްޑީޕީގެ މެމްބަރުން ގޮވާލައިފިއެވެ.

އެގޮތުން ބަހުސް ކުރައްވަމުން ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ ގަވަރުނަރު ވަކިކުރުމުގެ މައްސަލަ މަޖިލީހުގައި ހިންގުން ސިފަކުރެއްވީ ބަރުލަމާނީ ހަޔާތުގައި ކަޅު ދުވަހެއްގެ ގޮތުގަ އެވެ.

ގަވަރުނަރު ވަކިކުރުމުގެ ބަހުސްގައި ހުރިހާ ބޭފުޅުންގެ ވާހަކަތަކުން ވެސް ގަވަރުނަރަކީ ހުރިހާ މައްސަލައެއްގެ ގޮތުގައި ސިފަކުރެއްވި ނަމަވެސް އެކަން އޮތީ އެހެން ނޫން ކަމަށް އޭނާ ފާހަގަކުރެއްވިއެވެ.

ސަރުކާރު ވެރިކަމާ ހަވާލުވިއިރު ބަޖެޓެއް ހަވާލުކުރި ނަމަވެސް އެކަން މެނޭޖުކުރަން ނޭނގުނު ކަމަށް މައިނޯރިޓީ ލީޑަރު އަދި ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވެސް ވިދާޅުވިއެވެ.

ގަވަރުނަރު ވަކިކުރަނީ ސަރުކާރަށް ނޭނގޭ ނޭނގުން ފޮރުވުމުގެ ގޮތުގައި ނާޒިލް ވަނީ ސިފަ ކުރައްވާފައެވެ.