ކޮމިޝަނަރު ޖެނެރަލް އޮފް ކަސްޓަމްސްގެ މަގާމުގައި ހުންނެވި ޔޫސުފް މާނިއު މުހައްމަދު އެ މަގާމުން ވަކިކޮށް، ފުރަތަމަ ފަހަރަށް ކަސްޓަމްސްގެ ވެރިއަކަށް އަންހެން ބޭފުޅަކު އައްޔަނުކުރައްވައިފިއެވެ.
މި މަގާމަށް އައްޔަނުކޮށްފައިވަނީ ޑެޕިއުޓީ ކޮމިޝަނަރު އޮފް ކަސްޓަމްސްގެ މަގާމުގައި މިހާތަނަށް ހުންނެވި ފާތިމަތު ދިޔާނާ އެވެ. އޭނާއަށް މަގާމުގެ ފަތްކޮޅު ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ވަނީ ދެއްވައިފަ އެވެ.
މިއީ ކަސްޓަމްސްގެ ކޮމިޝަނާގެ މަގާމަށް އަންހެން ބޭފުޅަކު އައްޔަން ކުރެއްވި ފުރަތަމަ ފަހަރެވެ. ދިޔާނާ ކަސްޓަމްސްގައި މަސައްކަތް ކުރައްވާތާ 23 އަހަރު ވަނީ ވެފަ އެވެ.
ރައީސް އޮފީހުން މިއަދު ބުނީ، ކަސްޓަމްސްގެ ވެރިޔާގެ މަގާމުން މާނިއު ވަކިކޮށް ހޯމް މިނިސްޓްރީގެ ސްޓޭޓް މިނިސްޓަރަކަށް ބަދަލު ކުރައްވާފައިވާ ކަމަށެވެ. މި ބަދަލު ގެނައި ސަބަބެއް ރައީސް އޮފީހަކުން ހާމައެއް ނުކުރެ އެވެ.
މާނިއުއަކީ ކުރިން ނެޝަނަލް އިންޓެގްރިޓީ ކޮމިޝަން (އެންއައިސީ)ގެ ރައީސްކަންވެސް ކުރެއްވި ބޭފުޅެކެވެ. ނަމަވެސް އެންއައިސީގެ ބައެއް ތަހުގީގުތަކަށް ފުލުހުންގެ ބައެއް އިސްވެރިން ހުރަސްއަޅާ ކަމަށާއި އެގޮތަށް އަމަލުކުރާ އޮފިސަރުންނާ މެދު ގާނޫނީ ފިޔަވަޅު އަޅާނެ ކަމުގެ އިންޒާރު ދެއްވާފައި ވަނިކޮށް އޭނާ ވަނީ މަގާމުން ވަކިކޮށްފަ އެވެ.
