ހޯމްލޭންޑް މިނިސްޓްރީގެ ސްޓޭޓް މިނިސްޓަރުކަމަށް އައްޔަން ކުރުމުން އެ މަގާމުން އިސްތިއުފާ ދެއްވުމަށް އެދުނީ ވަޒީފާގެ މަސްއޫލިއްޔަތެއް ނެތި ބޮޑު މުސާރައެއް ނަންގަވަން ބޭނުން ނުވާތީކަމަށް ކުރީގެ ކޮމިޝަނަރ ޖެނެރަލް އޮފް ކަސްޓަމްސް ޔޫސުފް މާނިއު ވިދާޅުވެއްޖެއެވެ.

"ތޭރަ އޮންލައިން" އާއި ވާހަކަ ދައްކަވަމުން މާނިއު ވިދާޅުވީ ކޮމިޝަނަރ ޖެނެރަލް އޮފް ކަސްޓަމްސް ގެ މަގާމުން ވަކި ކުރި ސަބަބު އަދިވެސް ނޭނގޭ ކަމަށެވެ.

ނަމަވެސް ބޭރުތެރެއިން އަޑުއިވިފައިވާ ގޮތުގައި އޭނާ މަގާމުން ކުއްްލިގޮތަކަށް ވަކިކޮށްފައި ވަނީ މަޖިލީހުގެ 241 ކޮމިޓީގެ ބައްދަލުވުމުގައި މާނިއު ދެއްކި ބައެއް ވާހަކަތަކުގެ ސަބަބުން ކަމަށެވެ. ނަމަވެސް އެ ވާހަކަތަކަކީ ކޮންމެހެން ވެސް ދައްކަންޖެހޭ ވާހަކަތަކެއް ކަމަށް މާނިއު ވިދާޅުވިއެވެ.

ކޮމިޝަނަރ ޖެނެރަލް އޮފް ކަސްޓަމްގެ މަގާމަށް މާނިއު އައްޔަންކުރެއްވީ 20 ނޮވެމްބަރު 2023 ގައެވެ.

މި މަޤާމަށް ޔޫސުފް މާނިޢު މުޙައްމަދު އައްޔަނު ކުރައްވާފައިވަނީ ސްޓޭޓް މިނިސްޓަރ ފެންވަރުގައެވެ.

ނަމަވެސް ފަހުން މާނިއު އެ މަގާމުން ވަކިކޮށް އޭނާ ހޯމްލޭންޑް ސެކިއުރިޓީ މިނިސްޓްރީގެ ސްޓޭޓް މިނިސްޓަރުކަމުގެ މަގާމަށް ވަނީ އައްޔަންކޮށްފައެވެ.

މާނިއު ކަސްޓަމްސްއިން ވަކިކުރި ސަބަބެއް ސަރުކާރުގެ ފަރާތުން ވެސް ހާމަކޮށްފައިނުވެއެވެ.

މާނިއު ވިދާޅުވި ގޮތުގައި ވަޒީފާގެ މަސްއޫލިއްޔަތެއް ނެތި ބޮޑު މުސާރައެއް ނެގުމަކީ އެންމެ އެދެވޭ ގޮތް ނޫންކަމަށެވެ. އެކަމަށް އޭނާގެ ޒަމީރު ހުއްދައެއް ނުކުރެއެވެ.

ރައީސް ޑރ މުހައްމަދު މުއިއްޒަށް ވެރިކަން ހޯދައިދިނުމަށް މާނިއު ވަނީ ބުރަ މަސައްކަތްތަކެއް ކޮށްދެއްވާފައެވެ.

މާނިއު އެންޑް ފްރެންޑްސްގެ ނަމުގައި ރައީސް މުއިއްޒަށް ކެމްޕެއިންވެސް މާނިއު ވަނީ ކޮށްދެއްވާފައެވެ. އެހެންނަމަވެސް މާނިއު ކޮށްދެއްވި އެެއްވެސް ބުރަ މަސައްކަތެއް ރައީސް މުއިއްޒުގެ ފަރާތްޕުޅުން ބަލައިގަނެފައިނުވާކަން ފާހަގަކޮށްލެވެއެވެ.

މިކަމަށް އެންމެ ބޮޑަށް ބާރު ދެނީ އެއްވެސް ސަބަބެއް ނެތި، ކުއްލިގޮތަކަށް އޭނާ މަގާމުން ވަކި ކުރުމެވެ.