ކެމްޕޭނުގައި ރައީސް ޑރ. މުހައްމަދު މުއިއްޒު ވީ ވައުދާ ހިލާފަށް، ސިނަމާލެ ބުރިޖުން ދަތުރު ކުރާ ފަރާތްތަކުގެ އަތުން ފީއެއް ނަގަން ސަރުކާރުން ނިންމައިފި އެވެ.

މިކަން ހާމަކޮށްފައިވަނީ މާލޭގެ މަގުތަކަކީ އަމާން ތަނަކަށް ހެދުމަށް ރޭ އިފުތިތާހު ކުރި މާލެފަހި ޕްރޮގުރާމުގެ ތެރެއިން ކުރިއަށް ގެންދަން ނިންމާފައިވާ ކަންތައްތަކުގެ ތެރޭގަ އެވެ.

ޕީއެންސީގެ ވެރިކަމެއްގައި ސިނަމާލެ ބްރިޖް ބޭނުން ކުރާ ފަރާތްތަކުގެ އަތުން ފީއެއް ނަގާނެ ކަމަށް ރިޔާސީ އިންތިހާބުގެ ކެމްޕޭނު ދުވަސްވަރު އެކި ފަރާތްތަކުން ބުނަމުން ދިޔުމުން ރައީސް މުއިއްޒު ވަނީ އެކްސްގައި ޕޯސްޓެއް ކުރައްވާ އެކަން ދޮގުކޮށްފައެވެ.

އެގޮތުން މިދިޔަ އަހަރުގެ އޯގަސްޓު 29 ގައި ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ "އަޅުގަނޑުމެންގެ ވެރިކަމެއްގައި ސިނަމާލެ ބްރިޖު ބޭނުންކުރާ ރައްޔިތުން އަތުން ފީ ނަގަން ނިންމާފައިވާ ކަމަށް ފަތުރަމުންދަނީ ކަނޑައެޅިގެން ދޮގު ހަބަރެއް" ކަމަށެވެ. އަދި "ދޮގު ބުހުތާނު ވާހަކަތައް ފެތުރުމަކީ ޒިންމާދާރުކަން ކުޑަ، ނާތަހުޒީބު އަމަލެއް" ކަމަށް ވެސް އެ ޕޯސްޓުގައި ވިދާޅުވެފައިވެ އެވެ.

ރައީސް މުއިއްޒު އެހެން ވިދާޅުވި ނަމަވެސް ބުރިޖާއި ހައިވޭ ފަދަ ތަންތަނަށް "ޓޯލް ފީއެއް" ތައާރަފު ކުރަން، ސަރުކާރުން އިފުތިތާހު ކުރި މާލެފަހި ޕްރޮގުރާމުގައި ހިމަނައި ވަނީ އިއުލާންކޮށްފައެވެ.

އެޕްރޮގްރާމް އިފްތިތާހުކޮށްދެއްވީ ވެސް ހުދު އެމަނިކުފާނެވެ.

އެގޮތުން ބުރިޖާއި ހައިވޭ ފަދަ ތަންތަން ދެމެހެއްޓެނިވި ގޮތެއްގައި ބެލެހެއްޓުމަށް ކަމާ ގުޅުންހުރި ދައުލަތުގެ ހުރިހާ އިދާރާތަކާއި މަޝްވަރާ ކުރުމަށްފަހު ޓޯލް ފީއެއް ކަނޑައަޅައި ތަންފީޒު ކުރުމުގެ ނިޒާމެއް ގާއިމު ކުރުމާ ގުޅޭގޮތުން ހަދަންޖެހޭ ދިރާސާތައް ހެދުމުގެ މަސައްކަތް ކުރިއަށް އޮތް އޯގަސްޓު މަހުގެ ތެރޭގައި ފެށޭނެ ކަމަށް ރޭގެ ރަސްމިއްޔާތުގައި ވަނީ އިއުލާނުކޮށްފައެވެ.

މިކަމާ ގިނަ ބަޔަކު އަންނަނީ ފާޑުކިޔުން އަމާޒުކުރަމުންނެވެ.