މިހާތަނަށް އެއްވެސް އާރު.ޓީ.އައި އަކަށް ޖަވާބު ނުދީ ނޯންނާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިތުރުފުޅު ހައްދަވައިފިއެވެ.

ރައީސް މުއިއްޒު މިފަދައިން އިތުރުފުޅު ހައްދަވާފައިވަނީ ދިވެހިރާއްޖޭގެ މިނިވަންކަމަށް 59 އަހަރު ފުރުމުގެ މުނާސަބަތު ފާހަގަކުރުމުގެ ގޮތުން ރޭ ބޭއްވި ރަސްމީ ޖަލްސާގައެވެ.

އެގޮތުން އެމަނިކުފާނު ވިދާޅުވީ ރައީސުލްޖުމްހޫރިއްޔާގެ އޮފީސް ހިމެނޭހެން ސަރުކާރުގެ އެއްވެސް މިނިސްޓްރީއަކަށް، މަޢުލޫމާތު ހޯދައި ލިބިގަތުމުގެ ޙަައްގުގެ ދަށުން މިހާތަނަށް ހުށަހަޅާފައިވާ އެއްވެސް އާރު.ޓީ.އައި އަކަށް ސަރުކާރުން ޖަވާބު ނުދީ ނޯންނާނެކަމެށެވެ.

އެމަނިކުފާނު މިފަދައިން ވިދާޅުވި ނަމަވެސް މިއީ ކަނޑައެޅިގެން ބޮޑު ދޮގެކެވެ.

ނޫސްވެރިކަން ކުރާ ފަރާތްތަކާއި އަމިއްލަ ފަރާތްތަކުން ސަރުކާރުގެ އިދާރާތަކަށް މައުލޫމާތު ހޯދުމުގެ ހައްގުގެ ދަށުން ފޮނުވާ އާރްޓީއައިތަކަށް ޖަވާބު ލިބެނީ މަދު ފަހަރަކުއެވެ.

މީގެ ކުރީގެ ސަރުކާރުތަކާ ޚިލާފަށް، މި ސަރުކާރުން މުޅިން އަލަށް ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނައިބު ކުރައްވާ ރަސްމީ ދަތުރުފުޅުތަކުގެ ޚަރަދުތައް ޢާންމު ކުރަމުންދާ ކަމުގައި ވިދާޅުވި އިރު ރައީސް މުއިއްޒު ސައުދީއަށް ކުރެއްވި ދަތުރުފުޅުގެ ޚަރަދުތައް އަދިވެސް ހާމަކޮށްފައިނުވެއެވެ.

ހާމަކަން ބޮޑު ސަރުކާރެއްގެ ގޮތުގައި ދައުވާ ކުރި ނަމަވެސް ސަރުކާރުގެ ކަންކަން ހުރީ ފޮރުވިފައި ކަން ފާހަގަކޮށްލެވެއެވެ.