ރައީސް ޑރ. މުހައްމަދު މުއިއްޒުގެ ސަރުކާރުގެ ސިޔާސަތެކޭ ނަންނުގައްޗެއްގެ ދުވުމެކޭ އެއްފަދަ ކަމަށް ވިދާޅުވެ ރައީސް އަބްދުﷲ ޔާމީންގެ ފާޑުކިޔުން ސަރުކާރަށް އަމާޒުކުރައްވައިފިއެވެ.

މިދިޔަ ބުރާސްފަތި ދުވަހުގެރޭ ދަ ފްރޮންޓް އޮފީހުގައި ބޭއްވި ޖަލްސާގައި ޕީއެންއެފްގެ ރައީސް ޒޭން ޔާމީންއަށް އަމާޒުކުރެއްވި ސުވާލެއްގެ ތެރެއިން ރައީސް ޔާމީން ވަނީ ގައުމުގެ ކަންކަން ކުރިއަށްދާ ގޮތާ އަދި ސަރުކާރުގެ ސިޔާސަތުތަކުގެ ދެ ފުށް ނުފެންނާތީ އެކަމާ ގުޅިގެން ކަންބޮޑުވުން ފާޅުކުރައްވާފައެވެ.

އެގޮތުން ރައީސް ޔާމީން ވަނީ ރައްޔިތުންނާ ހަމައަށް ގެންނަ ސިޔާސަތުތައް ވާން ޖެހޭނީ، އެކަމާ މެދު ވިސްނައި، އޭގައި ސާބިތުވެ ހުރެވޭ ފަދަ ސިޔާސަތުތަކަކަށް ކަމަށް ވިދާޅުވެފައެވެ. އެހެން ނޫން ނަމަ، ދިވެހިން އަބަދުވެސް އުޅެން ޖެހޭނީ ވަރަށް ދަތި މަރުހަލާއެއްގައި ކަމަށް ރައީސް ޔާމީން ވިދާޅުވެފައިވެއެވެ.

ރައީސް ޔާމީން ވިދާޅުވި ގޮތުގައި ހަރަދު ކުޑަކުރަން ގަރުދިޔަ އާއި ބަތް ކާން ރައްޔިތުންނަށް އެންގުމުގެ ބަދަލުގައި ކިޔައިދޭންވީ، އެކަމަށް އަޅަން ޖެހޭނެ ފިޔަވަޅުތަކެވެ. މާލީ ގޮތުން އަޑިއަޅާލާފައިވާ ކަމާއި ހަރަދު ކުޑަކުރަން ޖެހޭ ކަމަށް ބުނެ ދެން އިއުލާންކުރަނީ، އަނެއްކާވެސް ކޮންމެވެސް ކަމަކަށް ކުރިއަށް އޮތް އަހަރުގެ ބަޖެޓުގައި ފައިސާ ހިމަނާނެކަން ކަމަށް ވިދާޅުވިއެވެ.