ރައީސް އަބްދުﷲ ޔާމީންގެ ފިލޯސޮފީއަށް ތާއީދުކުރައްވަން ޖެހެނީ އެމަނިކުފާނަކީ ރާއްޖޭގެ މިނިވަންކަމާ އިސްތިގުލާލު އަދި ދިނު ހިމާޔަތްކޮށްދެއްވި ހަަމައެކަނި ލީޑަރަށްވުމުންކަމަށް ކުރީގެ ކޮމިޝަނަރ އޮފް ޕޮލިސް ހުސެއިން ވަހީދު ވިދާޅުވެއްޖެއެވެ.

ހުސެއިން މިފަދައިން ވިދާޅުވީ، ރައީސް ޔާމީންގެ ޕާޓިއިން މަޖިލީހަށް ވާދަކުރުމުގެ ޝައުގުވެރިން ފާޅުކުރެއްވި ބައެއް ކެންޑިޑޭޓުން ތައާރަފްކުރުމަށް ބޭއްވި ޖަގަހަ ޖަލްސާގައި ކެންޑިޑޭޓަކާ ކުރިމަތިކުރުވި ސުވާލެއްގެ ތެރެއިންނެވެ.

އެގޮތުން ހުޅުމާލޭ އުތުރު ދާއިރާއަށް ރައީސް ޔާމީންގެ ޕާޓީއިން މަޖިލީހަށް ނުކުންނަން ޝައުގުވެރިކަން ފާޅުކުރައްވާފައިވާ އަހުމަދު ލަތީފު (ލަތީ)، އޭނާއަށް ވޯޓު ދޭން ޖެހެނީ ރައީސް ޔާމީން ތަމްސީލުކުރަން ނުކުންނަ ކެންޑިޑޭޓަށްވުމުން ކަމަށް ވިދާޅުވުމުން އެކަމާ ގުޅިގެން ހުސެއިން ވިދާޅުވީ، ރައީސް ޔާމީން ވެގެން ވޯޓުދޭން ނުޖެހޭ ކަމަށާ ނަމަވެސް އެމަނިކުފާނު ގެންގުޅުއްވި ހަރުދަނާ ސިޔާސަތުފުޅަކީ ރާއްޖެއަށް އެންމެ ފައިދާ ކުރަނިވި ސިޔާސަތުފުޅުތަކަށް ވުމުން ކަމަށް ހުސެއިން ވިދާޅުވިއެވެ.

ހުސެއިން ވަނީ ރައީސް ޔާމީން ފަދަ ގައުމީ ވަތަނީ ލީޑަރަކު މި ގައުމުގައި މިހާރު ނެތްކަން ހާމަކުރައްވާފައެވެ.