ފަލަސްތީނުގެ މިނިވަންކަމަށްޓަކައި ހަނގުރާމަކުރަމުންދާ ހަމާސްގެ ޕޮލިޓިކަލް ޗީފް، އިސްމާއިލް ހަނިއްޔާ ޝަހީދުކޮށްލިތާ އެއް ދުވަސް ފަހުން ދިވެހި ސަރުކާރުން، ދެ ފޮޅުވަތުގެ ބަޔާނަކުން އެކަން ކުށްވެރިކޮށްފިއެވެ.

އެގޮތުން ދިވެހި ޚާރިއްޖާއިން ނެރުނު ބަޔާނުގައި ބުނެފައިވަނީ ހަމާސްގެ ސިޔާސީ ބިއުރޯގެ ޗީފް ހަނިއްޔާ އީރާނުގައި ހުންނަވަނިކޮށް ބުދަ ދުވަހުގެ ހެނދުނުގެ ވަގުތެއްގައި އަވަހާރަކޮށްލި ކޮށްލުން ދިވެހި ސަރުކާރުން ހަރުކަށި އިބާރާތުން ކުށްވެރި ކުރާ ކަމަށެވެ.

އޭގެ އިތުރުން ބައިނަލްއަގްވާމީ ގާނޫނާއި އިންސާނީ ގާނޫނު ދަމަހައްޓައި ގާޒާގެ ދަތިކަމަށް އަވަސް އަދި ދާއިމީ ހައްލެއް ހޯދައި އެ ސަރަހައްދުގައި ސުލްހައާއި ހަމަޖެހުން ކަށަވަރުކުރުމަށް ހުރިހާ ގައުމުތަކަށް ދިވެހި ސަރުކާރުން ގޮވާލާ ކަމަށްވެސް ބުނެފައިވެއެވެ.

ހަނިއްޔާގެ ޖަނާޒާވެސް ބޭއްވި ފަހުން ދިވެހި ސަރުކާރުން، ސަހްޔޫނީންގެ ނަން ނުގެނަސް ދެ ފޮޅުވަތުގެ ބަޔާނެއް ނެރުމަކީ ފަލަސްތީނާ އެކު ދެމިތިބުކަމުގެ ހެއްކެއްކަމެއް ބަލައިނުގަނެވޭނެއެވެ. އެންމެ ދެ ފޮޅުވަތުގެ ބަޔާނަކުން، އިސްރާއީލުގެ ނަން ނުގެނެސް، ހަމާސްގެ ލީޑަރުގެ ޝަހީދު ކޮށްލުން ސަރުކާރުން ކުށްވެކުރީ އޮޅުވާލަންކަމަށް ގިނަ ބަޔަކު ތުހުމަތުކުރެއެވެ. އަދި އިސްލާމީ އުއްމަތުގެ ލީޑަރަކު ޝަހީދު ކޮށްލުން ކުށްވެރިކޮށް ރައީސް މުއިއްޒު މުއިއްޒު ޓްވީޓެއްހާ މިންވަރުވެސް ކޮށްނުލެއްވުމުން އެމަނިކުފާނަށް ވެސް ފާޑުކިޔުން އަމާޒުވެފައިވެއެވެ.