ފަލަސްތީނު ރައްޔިތުންގެ ހައްގުގައި މިއަދު މާލޭގައި އެއްވުމެއް ބާއްވަން ނިންމައިފިއެވެ.

އިސްރާ އެސޯސިއޭޝަނުގެ ފަރާތުން އިސްނަގައިގެން ބާއްވާ މި އެއްވުން އޮންނާނީ މިއަދު ހަވީރު 4:15 އިން 6:00 ގެ ނިޔަލަށް އާޓިފިޝަލް ބީޗު ސަރަހައްދުގައެވެ.

މި އެއްވުމުގައި ވީހާވެސް ގިނަ ބަޔަކު ބައިވެރިވުމަކީ އިސްރާ އެސޯސިއޭޝިއަންގެ އެދުމެކެވެ.

އިޒްރޭލުން ފަލަސްތީނުގެ ޣައްޒާއަށް ހަމަލާތައްދީ ޖަރީމާތައް ހިންގަމުން ގެންދާތާ މިހާރު ވަނީ 300 ދުވަސް ވެފައެވެ.

އިޒްރޭލުން ފަލަސްތީނަށް ހަމަލާދޭން ފެށީ މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ކަމަށްވާއިރު، ހަމަލާތަކުގައި މިހާތަނަށް 39،000 އަށް ވުރެ ގިނަ މީހުން ވަނީ ޝަހީދުވެފައެވެ. ހަނގުރާމައިގެ ސަބަބުން ގާޒާގެ 85 ޕަސެންޓު މީހުން ގެދޮރު ދޫކޮށް ގޮސްފައިވާއިރު، ގާޒާގެ ބައި މިލިއަނެއްހާ މީހުން ބަޑުހައިހޫނުކަން އަންނަނީ ތަހައްމަލު ކުރަމުންނެވެ.

އިޒްރޭލުން ދަނީ ބައިނަލްއަގުމާވީ ދުނިޔެއިން ފަލަސްތީނަށް އިންސާނީ އެހީ ފޯރުކޮށް ދޭން ކުރަމުން އަންނަ މަސައްކަތްތަކަށް ވެސް ހުއްޓުމެއް ނެތި ހުރަސް އަޅަމުންނެވެ.