ރައީސް މުހައްމަދު މުއިއްޒަކީ ސިޔާސި ގޮތުން ވެސް ހަންބޯ ބޭފުޅެއް ނޫންކަން އެނގިގެން ހިނގައްޖެ ކަމަށް ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ރައީސް މުއިއްޒު، ހަޔާތުގެ ބައިވެރިކައަށް ހައްދަވަން މެޑަމް ސާޖިދާ މުހައްމަދު ނިންމެވި ނިންމެވުމުގެ ތެރޭގައި އެމަނިކުފާނުގެ ސިފައިގެ ބައެއްކަންކަން ހިމެނޭކަމަށް ވިދާޅުވި ވިދާޅުވުމާ ގުޅުވާ ޕީއެންއެފްގެ ސެކެރެޓަރީ ޖެނެރަލް މުހައްމަދު މަލީހު ޖަމާލުވަނީ ބުރާސްފަތި ދުވަހުގެ ރޭ އޮތް ދަ ފްރޮންޓް އޮފީސް ޖަލްސާގައި ވާހަކަ ދައްކަވާފައެވެ.
އެކަމާ ގުޅިގެން ސަރުކާރުގެ ވެރިން މެދުވެރިކޮށް މީސް މީޑިޔާގައި ރައީސް މުއިއްޒު ޕޯސްޓުތައް ކުރުއްވަވަމުން ގެންދަވާތީ އެކަމަށް ފާޑުވިދާޅުވެ ޑރ. ޖަމީލު ވަނީ އެކްސްގައި ޕޯސްޓެއް ކުރައްވާފައެވެ.
ޕޯސްޓުގައި ޑރ. ޖަމީލު ވަނީ، ރިޔާސީ އިންތިހާބުގައި ވޯޓު ހޯއްދަވަން، ރައީސް މުއިއްޒުއާ އާއިލާއިންވެސް ކޫލް ވާހަކަތަކެއްގެ ގޮތުގައި ދެއްކެވި ވާހަކަތައް މިއަދު ހަމަ އެގޮތަށް އެހެން ބަޔަކު ދެއްކުމުން ހަޖަމް ކުރަން އުނދަގޫ ވެގެން ނުވާނެކަމަށް ވިދާޅުވެފައެވެ.
އެ ވާހަކަތަކަކީ އެއީ ޕަބްލިކްގައި ހުރި ވާހަކަތަކަކަށްވާއިރު އެ ވާހަކަތައް އެބޭފުޅުން ހިތްހަމަ ނުޖެހޭ ބަޔަކު ދެއްކީތީ، މުޅި ފައުޖު ނެރެ ޑިފެންސަށް ކުޅެން ފެށުމުން އެނގިގެން ދަނީ ރައީސް މުއިއްޒަކީ ނާގާބިލު ވެރިއެއް ކަން ކަމަށާ އެމަނިކުފާނަކީ ސިޔާސީ ގޮތުން ހަންބޯ ބޭފުޅެއް ނޫންކަން ކަމަށްވެސް ޑރ. ޖަމީލު ވިދާޅުވިއެވެ.
