ގައުމެއްގައި އަބަދުވެސް ފަހު ބަސް ބުނާނީ ރައްޔިތުންކަމާ ރައްޔިތުންގެ ބާރު އެއީ އެންމެ ގަދަ ބާރުކަން ހަނދުމަ ބެހެއްޓެވުމަށް، ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު، ރައީސް މުހައްމަދު މުއިއްޒަށް ގޮވާލައްވާއިފިއެވެ.

ޑރ. ޖަމީލު މިފަދައިން ގޮވާލައްވާފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން އަވައްޓެރި ބަންގްލަދޭޝުގައި ހިނގާ ދިޔަ ކަންތައް ތަކަކަށް އިޝާރާތްކުރައްވާ ޑރ. ޖަމީލު ވިދާޅުވީ، ފެނިގެން ދަނީ ބާރު އޮންނަނީ އަބަދުވެސް ރައްޔިތުންގެ އަތްމަތީގައިކަން ކަމަށެވެ.

އެހެންކަމުން މިވެރިކަމަށްވެސް ރައީސް މުހައްމަދު މުއިއްޒު ރައްޔިތުން ގެނައީ ސީދާ ރައީސް އަބްދުﷲ ޔާމީނަށް އިތުބާރު ކުރައްވާކަމަށް ވީހިނދު މިއަދު ރޯލް މޮޑެލް މެދުވެރިކޮށް އެމަނިކުފާނަށް ވަގަށް ގޮވާ އަނިޔާވެރިވެ ޝަރީއަތްތައް އަނެއްކާވެސް ކުރިއަށް ގެންދެވުނަސް ގައުމުގެ ކަންކަމުގައި ފަހުބަސް ބުނާނީ ރައްޔިތުންކަން ހަނދުމަ ބަހައްޓަން ޖެހޭ ކަމަށް ޑރ. ޖަމީލު ވިދާޅުވިއެވެ.

ޑރ. ޖަމީލު މިފަދައިން ވިދާޅުވެފައިވާއިރު، ރައިސް މުއިއްޒު ވެރިކަމަށް ވަޑައިގެންނެވީ ރައީސް ޔާމީންގެ ހިޔަލުގައި ހުންނަވައިގެން ކަމަށްވާއިރު އެމަނިކުފާނާ މެދު މި ސަރުކާރުން ކަންކުރި ގޮތުން ގިނަ ރައްޔިތުން ވަނީ މި ސަރުކާރުާ މެދު ހިތްހަމަ ނުޖެހިފައިކަން ފާހަގަކޮށްލެވެއެވެ. އަދި ވެރިކަމަށް ވަޑައިގެން، ރިޔާސީ އިންތިހާޞުގެ ތެރޭގައި ވެވަޑައިގެންނެވި ހުރިހާ ވައުދަކާ ޚިލާފުވަމުންދާތީ ވެސް ރައްޔިތުން ވަނީ މި ސަރުކާރާ މެދު ވަރަށް ބޮޑަށް ހިތްހަމަ ނުޖެހިފައިކަން ވެސް ފާހަގަކޮށްލެވެއެވެ. އަދި މިހާރު ގައުމުގައި އެކި ކަންކަމާ ގުޅިގެން ރައްޔިތުން ކުރާ މުޒާހަރާތައް ދަނީ ދުވަހެއް ދުވަހަކަށް އިތުރުވަމުންކަންވެސް ފާހަގަކޮށްލެވެއެވެ.