ޕަބްލިކު ފޯރަމްއެއް ގޮތަށް ޖަލްސާތައް ބާއްވަމުން ޕީޕަލްސް ނެޝަނަލް ފްރޮންޓު(ޕީއެންއެފް)އިން ގެންދާ ދިއުން ނަކަލު ކޮށް ސަރުކާރުން ފޯރަމްތައް ބާއްވަމުންދާތީ، އެ ޕާޓީ އުފެއްދުމުގައި އިސްކޮށް އުޅުއްވާ ޑރ. އަބްދުﷲ އިބްރާހިމުގެ ވަރުގަދަ ޗެލެންޖެއް ސަރުކާރަށް އަމާޒުކުރައްވައިފިއެވެ.

ޑރ. އަބްދުﷲގެ ޗެލެންޖެއް ސަރުކާރަށް އަމާޒުކޮށްފައިވަނީ ރައީސް ޔާމީންގެ ތާއީދާ އެކު ކުރިއަށް އޮތް މަޖިލީސް އިންތިހާބަށް ކުރިމަތިލާން ޝައުގުވެރިކަން ފާޅުކޮށްފައިވާ ކެންޑިޑޭޓުން ތައާރަފު ކުރުމަށް ދަ ފްރޮންޓް އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުންނެވެ.

އެގޮތުން ޑރ. އަބްދުﷲ ވިދާޅުވީ ބައެއްގެ ކަމެއް ނަކަލު ކުރަންޏާ އެކަމެއް ނަކަލު ކުރަންވާނީ ރަގަޅަށް ކަމަށާ އެހެންކަމުން ސަރުކާރު ތަމްސީލުކުރާ ފޯރަމްތަކުގައި ރައީސް ޔާމީން މިނިވަން ކުރުމަށް ގޮވާލަން ކެރޭނެތޯ ޑރ. އަބްދުﷲ ވަނީ އައްސަވާފައެވެ.

ޑރ. އަބްދުﷲ އިތުރަށް ވިދާޅުވީ ހަމައެކަނި ހެދުން ތުރު ކުރެއްވުމުގައި ހަމަ ގެންގުޅުއްވާ ބޭފުޅުން ބަލާ، ޑެޕިއުޓީ މިނިސްޓަރުން އައްޔަން ކުރުމަކުން ނުފުދޭ ކަމަށާ ކަމަށް ގާބީލު ބޭފުޅުން ކަންކަމަށް އައްޔަންކޮށްގެން މެނުވީ ސަރުކާރު ހަމަ އިސްކޮޅަށް ނުތެދުވެވޭނެ ކަމަށެވެ.