ރައީސް އިބްރާހިމް މުހައްމަދު ޞާލިހްގެ ސަރުކާރުގައި ހިނގި ކޮރަޕްޝަންގެ ވާހަކަތައް ނުދައްކާ އެއްވެސް ބޭފުޅެއް ސަރުކާރުގެ އިސް ފަޑީގައި ނުތިބޭނެ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ އެމަނިކުފާނު އަލަށް އުފައްދަވާ ސިޔާސީ ޕާޓީގެ ފަރާތުން 20 ވަނަ ރައްޔިތުންގެ މަޖިލީހަށް ކުރިމަތި ލައްވާ ކެންޑިޑޭޓޫން ތައާރަފް ކުރުމަށްޓަކައި ބޭއްވުނު ޖަލްސާގައި ވާހަކަދައްކަވަމުންނެވެ.

އެގޮތުން ރައީސް ޔާމީން ވިދާޅުވީ ކުރީގެ ރައީސް ޞާލިހްގެ ސަރުކާރުން ކޮރަޕްޝަންގެ އަމަލުތައް ހިންގެވި ކަމަަށް ޕީޕީއެމް/ޕީއެންސީ އަދި މިހާރު ޕީއެންއެފްގައި ތިއްބެވި ސިޔާސީ ލީޑަރުން ވެސް ދެއްކެވިކަމަށެވެ.

ރައްޔިތުންގެ ގާތަށް ގޮސް ކުރީ ސަރުކާރުގެ އެވާހަކަތައް ނުދައްކާ ސިޔާސީ ލީޑަރެއް މިއަދުގެ ސަރުކާރުގެ އިސްފަޑީގައި ނުހުންނާނެކަމަށްވެސް އެމަނިކުފާނު ވިދާޅުވިއެވެ.

އިދިކޮޅުގައި އޮންނަވާ އަދުގެ ސަރުކާރުގެ އިސްވެރިން ކުރީ ސަރުކާރުގެ ކޮރަޕްޝަންގެ ވާހަކަތައް ދެއްކެވި އިރު މިއަދު ވެރިކަމުގައި ހުންނަވާ ކޮރަޕްޝަންގެ މައްސަލަތައް ތަހްގީގު ކުރުމަށް އުޅުއްވާތޯ ވިދާޅުވެ ރައީސް ޔާމީން ވަނީ ސުވާލު ވެސް އުފައްދަވާފައެވެ.