މި ސަރުކާރުން މަރުކަރީ ބޭންކު (އެމްއެމްއޭ) ގެ ޒަމާންވީ ތަޖުރިބާކާރުން އެކަހެރިކޮށް އެހެން ފަރާތްތަކެއް އައްޔަން ކުރަމުން ގެންދަވާތީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަންބޮޑުވުން ފާޅުކޮށްފި އެވެ.

ހޯމަ ދުވަހުގެ ރޭ އެ ޕާޓީގެ ފަރާތުން ކުރިޔަށް ގެންދިޔަ ޕެނަލް ޑިސްކަޝަންގައި ވާހަކަދައްކަވަމުން އެ ޕާޓީގެ ތަރުޖަމާނު އަނަސް އަބްދުލް ސައްތާރު ވިދާޅުވީ ފެނިގެން މިދަނީ އެމްއެމްއޭގަ ތިއްބެވި ޕްރޮފެޝަނަލް ޒަމާންވީ ފަރާތްތައް އެކަހެރިކޮށް މުއައްސަސާގެ ނިންމުތަކުން އެބޭފުޅުން އެއްފަރާތްކޮށް މިސަރުކާރުގެ ސިޔާސީ ވިސްނުން ޕްރޮމޯޓުކުރުމަށްޓަކައި މުޅި ނިޒާމު ފުނޑާލާ މަންޒަރު ކަމަށެވެ.

އަނަސް ވިދާޅުވީ ފެންނަނީ ސަރުކާރު ހިއްސާވާ ކުންފުނިތައް ހިންގާ އުސޫލުން އެމްއެމްއޭ ހިންގަން އުޅޭ މަންޒަރުކަމަށެވެ.

އެގޮތުން މިނިސްޓަރު ފެންވަރުގަ ގަވަރުނަރު އައްޔަންކޮށް، އެމްއެމްއޭ އަށް ފަސް މެނޭޖިންގ ޑިރެކްޓަރުން އައްޔަންކުރަން ނިންމުމުން އެ ވާހަކަ ވެސް އަނަސް ވަނީ ފާހަގަކޮށް ސަރުކާރަށް ފާޑުކިޔާފަ އެވެ.

އެމްއެމްއޭ އަށް 5 އެމްޑީ އިން ހޯދަމުންދާތީވެ ގިނަ ބަޔަކު އަންނަނީ ސަރުކާރަށް ފާޑުކިޔަމުންނެވެ.