ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ ވެރިކަމުގެ 14 ހަފްތާ ހަމަވާން ކައިރިވެފައި ވީއިރުވެސް އެމަނިކުފާނަށް ފުއްދިފައިވަނީ މަދު ވައުދުތަކެއްކަން ހާމަވެއްޖެއެވެ.

ރައީސް އޮފީހުގެ ވެބްސައިޓްގައި ހިމަނުއްވާފައިވާ "ހަފްތާ 14" މަގު ޗާޓްގެ ޕޯޓަލް އިން ދައްކާ ގޮތުގައި ރައީސް ޑރ.މުހައްމަދު މުއިއްޒު ވަނީ 161 ވަޢުދު އޭގައި ހިމަނުއްވާފައެވެ. މި 161 ވައުދަކީ އެމަނިކުފާނުގެ ވެރިކަމުގެ 14 ހަފްތާ ތެރޭގައި ފުއްދަވާނެކަމަށް ނިންމި ވައުދުތަކެއްކަންވެސް ފާހަގަކޮށްލެވެއެވެ.

ހަފްތާ 14 މަގު ޗާޓްގައި 8 ބަޔަކަަށް އަލިއަޅުވާލާފައިވެއެވެ.

އޭގެއިތެރޭގައި:

• މިނިވަންކަމާއި ސިޔާދަތު

• އިސްލާމްދީނާއި ޤައުމިއްޔަތު

• ގެދޮރުވެރިކަމާއި އުމްރާނީ ތަރައްޤީ

• އިޤްތިޞާދާއި ތިމާވެށި

• އަންހެނުން، ޒުވާނުން، ފަންނިއްޔާތު އަދި ކުޅިވަރު

• ޞިއްޙީ ދުޅަހެޔޮކަމާއި އޯގާތެރި މުޖުތަމަޢު

• ތަޢުލީމާއި ތަމްރީނު

• ސަރުކާރުގެ ސިޔާސަތާއި ޤާނޫނީ އިޞްލާޙު

މި 8 ބައިގައި ވައުދުތައް ހިމަނުއްވާފައިވާއިރު ގިނަ ވައުދުތަކުގައި ހުރީ ވަކި އިންސައްތައެއް ފުރިހަމަ ވެފައިވާކަމަށެވެ. މިހާރު 11 ވަނަ ހަފްތާ ހިނގަމުންދާއިރު 4 ވަނަ ހަފްތާގައި ކުރައްވާނެ ކަމަށް ވެވަޑައިގެންނެވި ވައުދުތަކުގައިވެސް ހުރީ ވަކި އިންސައްތައަކަށް ފުއްދިފައިވާކަމަށް ބަޔާންކޮށްފައެވެ.

އެގޮތުން ދިވެހިރާއްޖޭގެ އެކްސްކްލޫސިވް އިކޮނޮމިކް ޒޯން (އީއީޒެޑް)ގެ ތެރެއިން ދެކުނު ކަނޑުގެ ސަރަހައްދުން ބައެއް ގެއްލޭ ގޮތަށް އިންޓަރނޭޝަނަލް ޓްރައިބުނަލް ފޮރ ދަ ލޯ އޮފް ދަ ސީ (އިޓްލޮސް)އިން ކޮށްފައިވާ ޙުކުމް އިސްތިޢުނާފުކުރައްވާނެ ކަމަށް ހަފްތާ 14 މަގު ޗާޓްގައި ހިމަނުއްވާފައިވާ ވައުދުގައި ވަނީ 65 އިންސައްތައިގެ މަސައްކަތް ފުރިހަމަވެފައިވާކަމަށެވެ. 14 ހަފްތާ ތެރޭގައި މިވައުދު ފުއްދިގެންދާނެކަމަށް ފާހަގަކޮށްފައިވާއިރު މި ވައުދު ދެން ވަގުތައް ފުއްދިގެންދާނެކަމާމެދު ގިނަ ބަޔަކު ޝައްކުކުރެއެވެ.

ނިމިދިޔަ ރިޔާސީ އިންތިޚާބުގެ ކެމްޕެއިން ދުވަސްވަރު އެންމެ އަޑު ހަރުކޮށް ރައީސް ޑރ.މުހައްމަދު މުއިއްޒު ވިދާޅުވަމުންދިޔައީ ވެރިކަމުގެ ފުރަތަމަ ދުވަހު ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރައްވާނެކަމަށެވެ. އެހެން ނަމަވެސް އިންތިޚާބުވެވަޑައިގަތުމަށްފަހު އެކުލަވާލި ހަފްތާ 14 މަގު ޗާޓްގައި އެ ވައުދު ހިމަނުއްވާފައި ނުވާކަން ފާހަގަވެއެވެ. ކެމްޕެއިން ދުވަސް ވަރު އެމަނިކުފާނު ވަނީ ގިނަ ކަން ކަން ކުރައްވާނެކަމަށް ވައުދުވެވަޑައިގެންފައެވެ. އެހެންނަމަވެސް ފާހަގަކޮށްލަންޖެހޭ ކަމަކީ ޕޯޓަލް އެކުލަވާލުމަށްފަހު އޭގައި އެމަނިކުފާނު ހިމަނުއްވާފައިވާ ވައުދު ތަކުގައި ކަން ކަން ކުރައްވާނެކަމުގެ ބަދަލުގައި އެކަންކަން ކުރަން "ފެށުން" މިފަދައިން ހިމަނުއްވާފައިވުމެވެ.

މި ސަރުކާރުން ވެވަޑައިގެންނެވި ގިނަ ވައުދުތައް ނުފުއްދާ ހުރުމުން ގިނަ ބަޔަކު އަންނަނީ ސަރުކާރަށް ފާޑުކިޔަމުންނެވެ.