ނ. މަނަދޫ އަންނާރުމާގޭ ނައީމާ މޫސާ، 62، މަރާލަން ރާވައި، އެކަމަށް ހިތްވަރާއި އިރުޝާދުދީ، ހުރިހާ އިންތިޒާމްތަކެއް ހަމަޖައްސައިދިނީ މި މައްސަލައިގައި ދައުވާ ލިބޭ ހަސަން ފަވާޒު ކަމަށް ދައުލަތުން ޝަރީއަތުގެ މަޖިލީހުގައި ބުނެފިއެވެ.

ނައީމާ މަރާލި މައްސަލައިގައި ދައުވާ ކުރާ ތިން މީހުންގެ މައްޗަށް ދައުވާ އިއްވުން ބުރާސްފަތި ދުވަހު ކޯޓުގައި ވަކިވަކިން ކުރިއަށް ގެންދިޔައިރު، ފައްވާޒުގެ މައްޗަށް ދައުވާ އިއްވަމުން ދައުލަތުގެ ވަކީލު ބުނި ގޮތުގައި ނައީމާއަކީ ސިހުރު ހަދާ މީހެއް ކަމަށް ބުނެ ސިހުރު ހަދާ މީހުން ގަތުލު ކުރުމަކީ ފާފަވެރިވާނެ ކަމެއް ނޫން ކަމަށް ބުނެ އަހުޒަމާއި ރިފާސްއަށް ވިސްނައިދީ އިރުޝާދު ދެމުން ދިޔައީ ފަވާޒެވެ.

މިދިޔަ އަހަރުގެ އޭޕްރީލް 6، ގައި ދަންވަރު އަހުޒާމާއި ރިފާސް އަންނާރުމާގެ ކައިރިއަށް ކާރެއްގައި ދުއްވާފައި ގެންގޮސްދިނީ ވެސް ފަވާޒު ކަމަށް ދައުލަތުން ބުންޏެވެ. ނައީމާ މަރާލަންވީ ގޮތުގެ އިރުޝާދު ވެސް އަހުޒަމާއި ރިފާސްއަށް ބުނެދިނީ ފަވާޒު ކަމަށް ވެސް ވަކީލު ބުންޏެވެ.

ގަސްތު މަރުގެ ދައުވާ އިއްވަމުން ދައުލަތުން ބުނީ، ނައީމާއަކީ ސިހުރު ހަދާ މީހެއް ކަމަށާއި، ސިހުރު ހަދާ މީހުން މަރައިގެން ފާފަވެރި ނުވާނެ ކަމަށް ރިފާސް އަދި އަހުޒަމަށް ފަވާޒް ވިސްނައިދީފައިވާ ކަމަށެވެ. ނައީމާ މަރާލުމަށް ބޭނުންވާ އާލަތްތައް ހޯދައި، އެ ދެ މީހުން ނައީމާ ދިރިއުޅޭ ގެއަށް ގެންދިޔައީ ފަވާޒް ދުއްވާ ކާރުގައި ކަމަށާއި، އެމީހުން ނައީމާ ދިރިއުޅޭ ގެއަށް ވަނީއްސުރެ ފޯނުން އެމީހުންނަށް ކަން ކުރާނެ ގޮތުގެ އިރުޝާދު ދީފައިވާ ކަމަށެވެ.

އޭގެ ފަހުން، ފަވާޒުގެ ކާރުގައި އެމީހުން މީހުން ނޫޅޭ ސަރަހައްދަކަށް ގެންގޮސް، ވަޅުގަނޑެއް ކޮނުމަށްފަހު ހުރިހާ އެއްޗެއް އަންދާލަން އިރުޝާދުދީ، ފެޓްރޯލް ހަމެއް ދީފައިވާ ކަމަށް ދައުލަތުން ބުންޏެވެ. ހެކި ނައްތާލުމަށް އެމީހުންނަށް އިރުޝާދުދީ، އެތަކެތި އަންދާލުމުން އެ ސަރަހައްދުން އަނބުރާ ގެންދިޔައީ ވެސް ފަވާޒްގެ ކާރުގައެވެ. އޭގެ ފަހުން މި މައްސަލައިގައި ރިފާސް ހައްޔަރު ކުރުމާއެކު ކުރިން ގެންގުޅުނު ފޯނު ނައްތާލުމަށްފަހު އާ ފޯނެއް ފަވާޒް ގަތް ކަމަށް ވެސް ދައުލަތުން ބުންޏެވެ. މިއީ އަދުލު އިންސާފު ކުރުމަށް ހުރަސް އެޅުމުގެ ދައުވާ ދައުލަތުން އުފުލި ސަބަބެވެ.

މައްޔިތާގެ ބޭނުން ނަހަމަ ގޮތުގައި ހިފުމުގެ ކުށުގެ ދައުވާ އުފުލާފައި ވަނީ، ނައީމާ މަރާލުމަށްފަހު އޭނާ އޮތް ކޮޓަރި އެތެރެއިން ތަޅުލާން އިރުޝާދު ދީފައި ވަނީ ފަވާޒް ކަމަށް ވާތީ ކަމަށް ދައުލަތުން ބުންޏެވެ. އެހެންވެ، ނައީމާގެ ހަށިގަނޑު ފެނިފައި ވަނީ 40 ގަޑިއިރު ފަހުން ކަމަށެވެ.

ދައުލަތުން އިއްވި ތިން ދައުވާއަށް ވެސް ފަވާޒު އިންކާރުކުރި އެވެ. ތިން މީހުންގެ މައްޗަށް ވެސް ދައުލަތުން ކުރާ ދައުވާތަކަކީ ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގެ ދައުވާއާއި އަދުލު އިންސާފު ގާއިމު ކުރުމަށް ހުރަސް އެޅުމުގެ ދައުވާއާއި، މައްޔިތާގެ ބޭނުން ނަހަމަ ގޮތުގައި ހިފުމުގެ ދައުވާއެވެ.

ދިފާއު ސާބިތުކުރަން ހެކި އެބަހުރިތޯ ގާޒީ އަލީ އާދަމް އެއްސެވުމުން ފަވާޒްގެ ދިފާއީ ވަކީލް އަހުމަދު ޔާމީން ވިދާޅުވެފައި ވަނީ އަދިވެސް ރިޕޯޓްތަކެއް ނުލިބޭތީ މިއަދު ހެކި ހުށަހެޅެން ނެތް ކަމަށެވެ. ހެކި ހުށަހެޅޭނީ އެ ރިޕޯޓްތައް ވެސް ލިބުމުން ކަމަށެވެ.

އެހެންކަމުން އެހާ ހިސާބުން އަޑުއެހުން ވަނީ ނިންމާލާފައެވެ. ދެން އޮންނަ ދުވަހަކުން އޮންނާނީ ދެ ފަރާތުން ވެސް ހެކި ހާމަ ކުރުމެވެ.

ނައީމާ މަރާލާފައި އޮއްވާ ފެނުނީ އޭޕްރީލް 7، 2023 ގެ ރޭގަނޑު އިރާކޮޅެވެ. އޭނާގެ ހަށިގަނޑުގެ އެކި ތަންތަނަށް ވަޅި ހަޅާފައި ހުއްޓެވެ. އަދި މުޅި ކޮޓަރިތެރެ އޮތީ ލެއިން ތަތްތެޅިފައެވެ.