މިހާރު އޮތީ ރަބާ ސްޓޭމްޕް ޖަހާ، ރައީސުލްޖުމްހޫރިއްޔާގެ މަޖިލީހެއް ކަމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވިދާޅުވެއްޖެއެވެ.

އޭނާ މިފަދައިން ވިދާޅުވެފައިވަނީ، އެމްޑީޕީން ރޭ ބޭއްވި ހަރުގެ ޖަލްސާގައި ވާހަކަ ދައްކަވަމުންނެވެ.

ކުޑޫ ވިދާޅުވީ ރައްޔިތުންގެ މަޖިލީހުގެ ޒިންމާއަކީ ގާނޫނު ހެދުމާއި ސަރުކާރު ޖަވާބުދާރީ ކުރުވުން ކަމަށްވާއިރު އެ ދެ ކަންތައް ވެސް މިހާރު ޕީއެންސީގެ މެޖޯރިޓީ އޮތް މަޖިލީހަށް ނުކުރެވޭ ކަމަށެވެ.

ކުޑޫ އިތުރަށް ވިދާޅުވީ މިހާރު ޖަލްސާގެ އެޖެންޑާ ލިބެނީ ޖަލްސާ އޮންނަ ދުވަހުގެ ކުރީ ރޭ ދަންވަރު ކަމަށާ މައްސަލައަށް ބަހުސްކުރާއިރު އެތައް ދުއްތުރާތަކެއް ދިމާވާ ކަމަށެވެ.

އޭގެ ސަބަބުން ގާނޫނީ ޒިންމާ އަދާކުރަން ހުރަސް އެޅޭކަން ފާހަގަކޮށް މިހާރު އޮތް މަޖިލީހަކީ ރައީސުލްޖުމްހޫރިއްޔާގެ މަޖިލީހެއްގެ ގޮތުގައި ކުޑޫ ސިފަކުރައްވާފައިވެއެވެ. އަދި އެއީ ރަބާ ސްޓޭމްޕް ޖަހާ މަޖިލީހެއް ކަމަށްވެސް އޭނާ ވިދާޅުވިއެވެ.

މީގ އިތުރުން ދައުލަތުގެ އެންމެ އަސާސީ ސިފައަކީ ތިން ބާރު ވަކިވެފައިވާ ނިޒާމެއް އޮތުންކަން ފާހަގަކުރައްވާ ކުޑޫ ވިދާޅުވީ އެއް ބާރުން އަނެއް ބާރަށް ފާރަވެރިވެ ޖަވާބުދާރީ ކުރުވުމުގެ ބޭނުމަކީ ރައްޔިތުންގެ ކަންކަމުގައި އެއްވެސް މީހަކަށް ފަރުވާކުޑަކުރުވިޔަ ނުދީ އިހުމާލު ހުއްޓުވުން ކަމަށެވެ.

ސަރުކާރުގެ މެމްބަރުން އެ މެމްބަރުންގެ ދާއިރާތަކުގެ ރައްޔިތުންގެ ހައްގުގައި ކަމެއް ނުކޮށް، އެމްޑީޕީން ކުރާ މަސައްކަތަށް ހުރަސްއަޅާނަމަ ހަނާވާނީ ރައްޔިތުން ކަން ކުޑޫ ފާހަގަކުރައްވާފައިވެއެވެ.

ކުޑޫ ވިދާޅުވީ ރައްޔިތުންގެ ހައްގުގައި ދެން ވެސް މަސައްކަތް ކުރާނީ އެމްޑީޕީ ކަމަށާއި އެކަން ބަދަލު ނުކުރާނެ ކަމަށެވެ.