މިދިޔަ ސަރުކާރުން ހިންގި "ބިންވެރިޔާ" ސްކީމުގެ ދަށުން މާލެ ސަރައްދުން ދޫކޮށްފައިވާ ގޯތިތައް އަތުލުމަށް ވެލިދޫ ދާއިރާގެ މެންބަރު މުހައްމަދު އައްބާސް މިއަދު ގޮވާލައްވައިފިއެވެ.

އައްބާސް މިފަދައިން ގޮވާލެއްވީ ރައްޔިތުންގެ މަޖިލީހަށް ހުށަހަޅާފައިވާ އާބަން ޑިވެލޮޕްމަންޓުގެ ބިލަށް ބަހުސް ކުރައްވަމުންނެވެ.

އައްބާސް ވިދާޅުވެފައިވާ ގޮތުގައި ބިންވެރިޔާ" ސްކީމުގެ ދަށުން މާލެ ސަރައްދުން ގޯތި ދޫކޮށްފައިވަނީ ގަވާއިދާ ހިލާފަށް ކަމަށް ބުނުމުގެ ބަދަލުގައި އެ ގޯތިތައް އަތުލަން ޖެހެއެވެ.

އެގޮތުން ފަޅުން ގޯތި ދޭ ގާނޫނެއް ނެތް ކަމަށާއި އެ ވާހަކަ ދެއްކުމުގެ ބަދަލުގައި ފަޅުން ދީފައިވާ ގޯތިތައް އަތުލަން ޖެހޭ ކަމަށް އައްބާސް ވިދާޅުވިއެވެ.

ކޮންމެ ސަރުކާރެއް ވެރިކަމަށް އައުމަށް ފަހު އޭގެ ކުރީ ސަރުކާރުން ވައްކަން ކުރި ކަމަށް ބުނާ ކަމަށާއި އެ ކަން ކުރި ބަޔަކަށް އަދަބު ނުދެވޭ ކަމަށް ވިދާޅުވެ އައްބާސް މިއަދު މަޖިލީހުގައި ކަންބޮޑުވުން ފާޅުކުރެއްވިއެވެ. އަދި އެފަދަ ޖަރީމާތައް ހިންގާފައިވާ މީހުންގެ މުދާ ވެސް ދައުލަތަށް ނެގުމަށް އައްބާސް ގޮވާލެއްވިއެވެ.

ގޯތިތައް އަތުލަން ސަރުކާރަށް ތާއީދުކުރާ އެމްޑީއޭގެ ނައިބު ރައީސްކަން ވެސް ކުރައްވާ އައްބާސް ގޮވާޅާފައިވާއިރު ރައީސް މުހައްމަދު މުއިއްޒު ރިޔާސީ އިންތިހާބުގެ ތެރޭގައި ވަނީ އެއްވެސް ގޯއްޗެއް އަދި ފްެލެޓެއްވެސް އަތު ނުލާނެ ކަމަށް ވައުދުވެވަޑައިގެންފައެވެ.