ސަރުކާރުގެ އަމަލުތަށް ހުންނެވިގޮތުން ރައީސް އަބްދުﷲ ޔާމީން އަބްދުލްގައްޔޫމް އަލަށް އުފައްދަވާ ސިޔާސީ ޕާޓީ، ޕީޕަލްސް ނޭޝަނަލް ފްރޮންޓް (ޕީއެންއެފް) އުފެެއްދެވުމުގައި އިސްކޮށް ހަރަކާތްތެރިވާ އެެއް ފަރާތްކަމަށްވާ މުހައްމަދު މަލީހް ޖަމާލް ފާޑު އަމާޒުކުރައްވައިފިއެވެ.
ފޭސްބުކްގައި މަލީހް ކުރެއްވި ޕޯސްޓެއްގައި ވަނީ ރައީސް ޔާމީންގެ ފޮޓޯއެއް ހިއްސާ ކުރައްވާ އެމަނިކުފާނު މިނިވަން ކުރަން މި ސަރުކާރުން ވި ވައުދު ފުއްދާފައިނުވާކަމަށް ވިދާޅުވެފައެވެ.
ރައީސް ޔާމީންގެ ޕާޓީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އެމަނިކުފާނުގެ އަތްޕުޅުން ފޭރިގަނެ، އެ ޕާޓީ މިހާރު ވަނީ ފައްތާލާފައިކަމަށް ވެސް މަލީހް ވަނީ ޕޯސްޓްގައި ފާހަގަކުރައްވާފައެވެ.
އޭގެއިތުރުންވެސް ރައީސް ޑރ.މުހައްމަދު މުއިއްޒު އައްޔަން ކުރައްވާފައިވާ ވަޒީރުންނަށް އިދިކޮޅު ޕާޓީގެ މެޖޯރިޓީ އޮންނަ ރައްޔިތުންގެ މަޖިލީހުން ރުހުން ނުދެއްވާނެ ކަމުގެ ބިރު ހީވެ އެމްޑީޕީ އަށް ނިސްބަތްވާ 13 މެމްބަރަކަށް ރިޝްވަތު ދިނުމަށްފަހު ގަނެފައިވާ ކަމުގެ ތުހުމަތުވެސް މަލީހް ވަނީ ކުރައްވާފައެވެ.
ރިޔާސީ އެއް ވައުދެއްގެ ގޮތުގައި ފާހަގަކުރެއްވި އިންޑިޔާގެ ސިފައިން ބާލަފައިނުވާކަމަށާއި ކުރީ ސަރުކާރުގެ ސިއްރު ސިޓީ އަކުން ވިއްކާލާފައިވާ ދެކުނުގެ ކަނޑު ވެސް އަނބުރާ ހޯދާފައިނުވާކަމަށް މަލީހް ވަނީ ވިދާޅުވެފައެވެ.
ރައީސް ޔާމީންގެ ތަސައްވަރެއްކަމަށްވާ ފުށިދިއްގަރުފަޅު ހިއްކަން ސަރުކާރުން ފަށާފައިވަނީ ބަޖަޓެއް ފާސްނުކޮށް އޮއްވާ ކަމަށާއި އެ ސަރަހައްދު ހިއްކުމަށްފަހު މާލެ އާއި ގުޅުވާލާނީ ކަނޑު އަޑީގެ ޓަނަލަކުންނޭ ރައީސް ވިދާޅުވުމުން މަލީހް ވަނީ އެ ވާހަކަ ހިޔާލީ ފޮލާއެއް ގޮތައް ސިފަކުރައްވާފައެވެ.
ސަރުކާރުގެ ކަންކަން މިހެން ހުރުމުން މަލީހްގެ އިތުރުން ގިނަ ބަޔަކު އަންނަނީ ސަރުކާރަށް ފާޑު އަމާޒުކުރަމުންނެވެ.
