އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން ދުނިޔޭގެ ކޯޓުގެ ނިންމުންތަކަށް ފަލަސްތީނުން މަރުހަބާ ކިޔައިފިއެވެ.

އައިސީޖޭއިން ބައެއް ނިންމުންތައް ނިންމާފައިވަނީ މިދިޔަ މަހުގެ 29 ވަނަ ދުވަހު ދެކުނު އެފްރިކާއިން އެ ކޯޓަށް ހުށަހެޅި މައްސަލައިގައިކަން ފާހަގަކޮށްލެވެއެވެ.

އެ މައްސަލައަކީ އެއީ އިސްރާއީލުން ޣައްޒާއަށް ދެމުން އަންނަ ހަމަލާތަކާއި ގުޅިގެން ހުށަހެޅި މައްސަލައެކެވެ.

މިމައްސަލައިގެ އަޑުއެހުންތައް ފަށާފައިވާއިރު، ބައެއް ނިންމުންތައް އެކޯޓުން ވަނީ ނިންމާފައެވެ.

އެގޮތުން ޣައްޒާއަށް އެހީފޯރުކޮށްދިނުމަށް ކޯޓުން ވަނީ އަމުރު ކޮށްފައެވެ.

ކޯޓުގެ މިފަދަ ނިންމުންތަކާއި ގުޅިގެން ފަލަސްތީނުގެ ފޮރިން މިނިސްޓްރީން ވަނީ މަރުހަބާ ކިޔާފައެވެ.

އެގޮތުން މިނިސްޓްރީން ނެރުނު ބަޔާނެއްގައި ބުނެފައިވަނީ އެނިންމުމަކީ އެއްވެސް ދައުލަތެއް ޤާނޫނަށް ވުރެ މަތީގައި ނެތްކަން ހަނދާންކޮށްދޭ މުހިންމު ނިންމުމެއް ކަމަށެވެ.

ދެކުނު އެފްރިކާއަށް ތާއިދު ކުރާ ގައުމުތަކުގެ ތެރޭގައި ބްރެޒިލް، މެލޭޝިއާ، ތުރުކީ، އުރުދުން، ބޮލީވިއާ، ރާއްޖެ، ނަމީބިއާ، ޕާކިސްތާން އަދި ކޮލަމްބިއގެ އިތުރުން އިސްލާމިކް ކޯޕަރޭޝަންގެ މެމްބަރުން ހިމެނެއެވެ.

ފަލަސްތީނުގައި މިހާރު ހިނގަމުން އަންނަ ލާއިންސާނީ އަމަލުގައި އެތައްް ބަޔަކު ވަނީ ޝަހީދުކޮށްލާފައެވެ.