ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ އާބަން ޑިވެލޮލްމަންޓް ބިލަކީ ލާމަރުކަޒީ ނިޒާމު މަރާލާނެ ބިލެއް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.

ފައްޔާޒް މިފަދައިން ވިދާޅުވެފައި ވަނީ އެމްޑީޕީގެ ގައުމީ މަޖިލީހުން ރޭ ބޭއްވި ބައްދަލުވުމުގައި ވާހަކަ ދައްކަވަމުންނެވެ.

އެގޮތުން ފައްޔާޒު ވިދާޅުވީ ބިލް އޮތް ގޮތަށް ފާސްކޮށްފިނަމަ ކައުންސިލްތަކަށް މިދިޔަ ފަސް އަހަރު ދީފައިވާ ގިނަ ބާރުތަކެއް ގެއްލިގެން ދާނެ ކަމަށެވެ.

އަދި އިތުރަށް ފައްޔާޒް ވިދާޅުވީ ރާއްޖޭގެ ޑިމޮކްރެސީ ދެމެހެއްޓުމުގައި ކައުންސިލަރުންގެ ދައުރު ވަރަށް ބޮޑު ކަމަށެވެ.

ކައުންސިލަރުންގެ ބާރު ކުޑަ ކުރުމަކީ މުޅި ޑިމޮކްރެޓިކް ނިޒާމަށް ދެވޭ ހަމަލާއެއްގެ ގޮތުގައި ވެސް ފައްޔާޒް ވަނީ ސިފަކުރައްވާފައެވެ.

ސަރުކާރުން ހުށަހަޅާފައިވާ ބިލުގެ މާއްދާއެއްގައި އާބަން ސެންޓަރުގެ ގޮތުގައި ކަނޑައެޅޭ ބައެއް ސަރަހައްދުތަކުގެ ކަންކަން ސަރުކާރަށް ނިންމޭ ގޮތަށް އޮތުމުން ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.