ރާއްޖެ އިގްތިޞާދީ ގޮތުން މިހާ ބޮޑު އަނދަވަޅަކަށް މި ވެއްޓުނީ ލިބޭނެ ކަމަށް ލަފާ ކުރާ ފައިސާއަށް ބަރޯސާކޮށްގެން ކަންތައްތައް ކުރަން އުޅުމުން ކަމަށް ކުރީގެ ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.
އަމީރު މިފަދައިން ވިދާޅުވީ އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ.
އެގޮތުން އަމީރު ވިދާޅުވީ ހަރަދު ކުޑަކުރުމުގެ އެއްވެސް ފިޔަވަޅެއް ސަރުކާރުން ނާޅާ ކަމަށާއި ބައިނަލްއަގުވާމީ މުޖުތަމައުން އެކަންކަން ބަލާނެ ކަމަށެވެ.އަދި އެކަން އެހެން އޮއްވައި ރާއްޖެއަށް މާލީ އެހީތެރިކަން ދޭނީ ކޮން ބައެއްތޯ ވެސް އަހާ އަމީރު ވަނީ ސުވާލު އުފައްދަވާފަ އެވެ.
އަމީރު އިތުރަށް ވިދާޅުވި ގޮތުގައި ކަންތަައްތައް ދަނީ ރަނގަޅަށް ނޫން ކަން ސަރުކާރަށް މިހާރު ރޭކާލާން ފަށައިފިކަމަށެވެ.
އަމީރު ވަނީ ސަރުކާރުން ބީއެމްއެލްއަށް ނުފޫޒު ފޯރުވަން މަސައްކަތް ކުރައްވާ ކަމަށް ވެސް ތުހުމަތު ކުރައްވައިފަ އެވެ. އޭނާ ވިދާޅުވީ ފިޗާއި މޫޑީސް ފަދަ ކްރެޑިޓް ރޭޓިން އޭޖެންސީތަކުން އެފަދަ ކަންކަމަށް ބެލުމަށްފަހު ރާއްޖޭގެ ކްރެޑިޓް ރޭންކިން ކުރިއަށް އޮތް ތަނުގައި ދަށް ކުރުން ގާތް ކަމަށެވެ.
